Financimi i partive, Celibashi: Lidhja ndërmjet politikës dhe parasë mund t’i bëjë politikanët më të përgjegjshëm ndaj kontribuesve, sesa kundrejt votuesve.

29/01/2021 | Lajme

Komisioneri Shtetëror të Zgjedhjeve, z. Ilirjan Celibashi mori pjesë në konferencën kombëtare “Kostot e Demokracisë II; Paratë në politikë dhe Integriteti Zgjedhor”, organizuar nga Koalicionin për Reforma, Integrim dhe Institucione të Konsoliduara (KRIIK). (Fjala e plotë e Komisionerit).

Në konferencë morën pjesë znj. Yuri KIM, Ambasadore e Shteteve të Bashkuara të Amerikës, z. Duncan NORMAN, Ambasador i Mbretërisë së Bashkuar, përfaqësues të intitucioneve, të partive politike dhe shoqërisë civile.

Qëllimi i konferencës ishte risjellja në vëmendje dhe adresimi i mangësive e problematikave mbi transparencën dhe mbikqyrjen efektive të financave të partive dhe fushatave zgjedhore, si një nga aspektet kryesore dhe më me ndikim në integritetin zgjedhor.

Në fjalën e tij z. Celibashi tha se “Është e qartë që çeshtja e raportit të parasë me politikën është gjithnjë në fokus të diskutimeve të politikës, medias dhe shoqërisë civile. Diskutimi mbi rolin e parasë në politikë dhe raporti ndërmjet tyre është i rëndësishëm sepse ka një shqetësim të madh nga qytetarët, nga opinioni publik në lidhje me këtë aspekt, dhe ky shqetësim i madh është i përligjur. Është i përligjur sepse raporti ndërmjet politikës dhe parasë mund t’i bëjë politikanët më të përgjegjshëm ndaj kontribuesve dhe mbështetësve financiarë të tyre, sesa kundrejt votuesve”.

Komisioneri foli për rëndësinë e rolit që ka shoqëria civile dhe media për monitorimin se si paraja lëviz brenda dhe jashtë sistemit politik, veçanërisht në rastet kur paratë që vijnë nga aktivitete kriminale sponsorizojnë politikën.

Celibashi i bëri apel shoqërisë civile dhe medias, por edhe institucioneve që e kanë detyrë, që të angazhohen seriozisht në një fushatë sensibilizuese, për ti bërë zgjedhësit të vetëdijshëm veçanërisht për efektet e shitblerjes së votës

 

LajmeFinancimi i partive, Celibashi: Lidhja ndërmjet politikës dhe parasë mund t’i bëjë politikanët më të përgjegjshëm ndaj kontribuesve, sesa kundrejt votuesve.