Sot, Komisioneri Shtetëror i Zgjedhjeve vendosi plotësimin e vakancës në këshillin e bashkisë Korçë, me kandidatin nga lista shumemërore e Partisë Socialiste të Shqipërisë, zj. Olta Luan Zylyftar. Shpalli vendimin për shqyrtimin e denoncimit të Organizatës “Qendresa Qytetare” ndaj kandidatit për Kryetar Bashkie Rrogozhinë z. Edison Memolla, Ministrit të Shtetit për Rindërtimin dhe Programin e Reformave, z. Arben Ahmetaj, deputetit të Kuvendit të Republikës së Shqipërisë z. Etjen Xhafaj dhe Partisë Socialiste të Shqipërisë, për shkelje administrative në kuadër të fushatës zgjedhore, për zgjedhjet e pjesshme për kryetar bashkie të datës 6 Mars 2022. KShZ vendosi përfundimin e shqyrtimit administrativ të denoncimit ndaj z. Arben Ahmetaj, Ministër i Shtetit për Rindërtimin dhe Programin e Reformave dhe ndaj deputetit z. Etjen Xhafaj, deputet i Kuvendit të Republikës së Shqipërisë, si dhe vendosi sanksionin administrativ me gjobë ndaj z. Edison Memolla, kryetari i Bashkisë Rrogozhinë, në shumën 30 000 (tridhjetë mijë) lekë.
Gjithashtu, në seancën e sotme u shqyrtuan denoncimet e bëra nga organizata “Qëndresa Qytetare për shkelje administrative në kuadër të fushatës zgjedhore, për zgjedhjet e pjesshme për kryetar bashkie, të datës 6 Mars 2022:
- Ndaj Fatmir Juka, Drejtor i Galerisë së Arteve Shkodër, z. Xhemal Bushati, kandidati për kryetar i bashkisë Shkodër dhe Partisë Demokratike;
- Ndaj zj. Eriselda Sefa, kandidate për kryetar të Bashkisë Lushnjë, z. Haki Çako Drejtor i Agjencisë Kombëtare të Mbrojtjes Civile dhe subjektit zgjedhor “Partia Socialiste e Shqipërisë;
- Ndaj zj. Majlinda Angoni, kandidate për kryetar të Bashkisë Shkodër, z. Haki Çako, Drejtor i Agjencisë Kombëtare të Mbrojtjes Civile dhe subjektit zgjedhor “Partia Socialiste e Shqipërisë;
- Ndaj zj. Majlinda Angoni, kandidate për kryetar të Bashkisë Shkodër, qendrës shëndetësore “Rrethina”, ambulanca Dobraç, zj. Edona Tafa dhe subjektit zgjedhor “Partia Socialiste e Shqipërisë”.
Shpallja e vendimeve të Komisionerit do të bëhet në seancën e radhës.
