Komisioneri Shtetëror i Zgjedhjeve, z. Ilirjan Celibashi priti në takim përfaqësues të shoqërisë civile, zj. Erida Skëndaj, Komiteti Shqiptar i Helsinkit (KShH), zj. Edlira Çepani, Rrjeti i Grave “Barazi në Vendimmarrje”, z. Afrim Krasniqi, Instituti i Studimeve Politike (ISP), z. Erjon Tase, Akademia e Studimeve Politike (ASP) dhe z. Rigels Xhemollari, Qëndresa Qytetare.

Qëllimi i takimit ishte diskutimi mbi problematikat dhe këndvështrimin e shoqërisë civile lidhur me zgjedhjet e organeve të qeverisjes vendore, të datës 14 Maj 2023. 

Shoqëria civile është e angazhuar në monitorimin e procesit zgjedhor, ndaj bashkëbisedimi u fokusua tek financimi i partive politike gjatë fushatës zgjedhore dhe aksesi i barabarabartë i kandidatëve meshkuj dhe femra në financat e partive, keqpërdorimi i burimeve shtetërore, verifikimi i kandidatëve për kryetar bashkie dhe këshilla bashkiak, përmirësimi i kuadrit ligjor dhe atij nënligjor, e të tjerë.

Komisioneri pasi i njohu me punën dhe masat e marra nga KQZ për mirëorganizimin dhe administrimin e procesit zgjedhor, shprehu gadishmërinë për të bashkëpunuar për adresimin e çdo problematike të hasur, si edhe vlerësimin e sugjerimeve të tyre.