Komisioni Qendror i Zgjedhjeve i Shqipërisë dhe KQZ e Republikës së Kosovës, nënshkruan marrëveshje bashkëpunimi në Prishtinë dhe në emër të dy institucioneve nënshkruan Komisioneri Shtetëror i Zgjedhjeve, Ilirjan Celibashi dhe Kryesuesi i KQZ-së, Kreshnik Radoniqi.

Marrëveshja ka për qëllim institucionalizimin e bashkëpunimit mes dy institucioneve, në funksion të rritjes së eficiencës së punës dhe modernizimit të të gjithë aspekteve të organizimit, menaxhimit dhe administrimit të zgjedhjeve.

Me synim rritjen e standardeve të proceseve zgjedhore në Shqipëri dhe Kosovë, dy institucionet dakordësuan për të mbështetur njëri-tjetrin me ekspertizë, asistencë teknike dhe logjistike lidhur me votimin nga jashtë, teknologjinë zgjedhore dhe financimin e partive politike. Gjithashtu, do të shkëmbehen praktikat më të mira të strategjive të ndjekura për edukimin e zgjedhësve.

Dy KQZ-të do të vazhdojnë të mbështesin njëra-tjetrën për pjesëmarrje në organizata ndërkombëtare me ekspertizë zgjedhore si dhe në aktivitetet e organizuara prej tyre.