Sot u zhvillua konferenca parazgjedhore “Depolitizimi i Administratës Zgjedhore – Nevoja për Administratorë Profesionistë Zgjedhorë”, bashkëorganizuar nga Komisioni Qendror i Zgjedhjeve i Shqipërisë, Asambleja Parlamentare e Këshillit të Evropës (PACE), Prezenca e OSBE-së dhe Komisioni i Venecias.
Konferenca bëri së bashku përfaqësues të organeve drejtuese të KQZ-së, partive politike, shoqërisë civile dhe ekspertë ndërkombëtarë.
Fokusi i diskutimeve ishte adresimi i sfidave të administratës zgjedhore, duke nënvizuar nevojën për punonjës elektoralë të paanshëm dhe të trajnuar mirë.
Komisioneri Shtetëror i Zgjedhjeve, z. Ilirjan Celibashi tha se duke konsideruar situatën aktuale politike, partitë politike nuk mund të përjashtohen nga administrimi i procesit zgjedhor në nivelin e dytë dhe të tretë. “Partitë nuk mund të jenë ato dhe vetëm ato të gjithëpushteteshme në administrimin e procesit zgjedhor në nivelin e dytë dhe të tretë të tij. Por edhe idea e pasjes së një administrate zgjedhore me funksionarë publik, për mendimin tim nuk është me dobi. Një përbërje hibride, ku partitë të vazhdojnë të jenë qenësisht të përfshira në administrimin e procesit zgjedhor dhe nga ana tjetër, KQZ të ketë gjithashtu një rol më të madh në ndërtimin e kësaj administrate mund të jetë një formulë e duhur dhe funksionale” – tha KSHZ Celibashi.
Zonja Liri Kopaçi-Di Michele, Kryesuese e Divizionit të Bashkëpunimit Parlamentar dhe Zgjedhor të Asamblesë Parlamentare të Këshillit të Evropës tha se “Demokracia është një udhëtim i vazhdueshëm, jo një destinacion. Duke institucionalizuar standardet profesionale dhe duke mbrojtur zgjedhjet nga ndërhyrjet politike, Shqipëria ka një mundësi për të forcuar jo vetëm sistemin e saj zgjedhor, por edhe strukturën demokratike të shoqërisë së saj. Objektivi që synojmë të arrijmë duke punuar së bashku është një ku çdo punonjës zgjedhor trajnohet sipas standardeve më të larta, çdo komision funksionon në mënyrë të pavarur dhe çdo zgjedhje frymëzon besim tek qytetarët – duke ndërtuar një Shqipëri ku demokracia është e qëndrueshme, transparente dhe gjithëpërfshirëse.”
Ambasadori Tarran përsëriti angazhimin e Prezencës së OSBE-së për të mbështetur përpjekjet reformuese të Shqipërisë. Ndër të tjera, ai tha: Një administratë zgjedhore e kualifikuar dhe e paanshme garanton që çdo votë të numërohet në mënyrë të drejtë dhe transparente. Me caktimin e ditës së zgjedhjeve për më 11 maj 2025, është koha për të mbështetur KQZ-në për zgjedhjet e ardhshme përmes një administrimi sa më profesional.
Gjatë diskutimeve u trajtuan tema si paanshmëria e organeve të menaxhimit të zgjedhjeve dhe standardet ndërkombëtare, me kontribute nga PACE, Komisioni i Venecias dhe OSBE dhe praktikat më të mira të vendeve të tjera.
Konferenca theksoi rëndësinë e organeve profesionale të menaxhimit të zgjedhjeve si një gur themeli i zgjedhjeve demokratike.
