Politika e Privatësisë

Politika e Privatësisë dhe Mbrojtjes së të Dhënave Personale e Komisionit Qendror të Zgjedhjeve

1. Qëllimi i kësaj politike

Komisioni Qendror i Zgjedhjeve (këtu e në vijim, KQZ) respekton të drejtën e çdo individi për privatësi dhe mbrojtjen e të dhënave personale.

Kjo politikë shpjegon se çfarë të dhënash personale përpunon KQZ, për çfarë qëllimesh, mbi çfarë baze ligjore, për sa kohë ruhen ato, kujt mund t’i vihen në dispozicion dhe cilat janë të drejtat e individëve në lidhje me të dhënat e tyre.

Përpunimi i të dhënave personale kryhet në përputhje me ligjin nr. 124/2024 “Për mbrojtjen e të dhënave personale”, Kodin Zgjedhor dhe legjislacionin tjetër të zbatueshëm për veprimtarinë e KQZ-së.

2. Kush është kontrolluesi i të dhënave?

Për përpunimet e të dhënave personale për të cilat përcakton qëllimin dhe mënyrën e përpunimit, kontrollues është:

Komisioni Qendror i Zgjedhjeve
Rruga “Ibrahim Rugova”, nr. 4, Tiranë, Shqipëri.
E-mail: info@kqz.gov.al
Faqja zyrtare: kqz.gov.al

3. Nëpunësi për mbrojtjen e të dhënave personale

Në përputhje me ligjin nr. 124/2024, KQZ ka caktuar Nëpunësin për Mbrojtjen e të Dhënave Personale.

Për çdo pyetje lidhur me përpunimin e të dhënave tuaja personale ose për ushtrimin e të drejtave tuaja, mund të kontaktoni:

Pavlina Doçaj, Drejtor i Drejtorisë së Subjekteve Zgjedhore, Mbikëqyrjes Financiare dhe Monitorimit të Fushatës

E-mail: pavlina.docaj@kqz.gov.al

4. Çfarë të dhënash përpunojmë dhe përse?

KQZ përpunon vetëm të dhënat personale që janë të nevojshme për ushtrimin e kompetencave të tij ligjore dhe për ofrimin e shërbimeve për qytetarët dhe subjektet që ndërveprojnë me institucionin.

Kategoria	Qëllimi kryesor
Qytetarët që paraqesin kërkesa, ankesa ose denoncime	Administrimi dhe shqyrtimi i kërkesës, ankesës ose denoncimit dhe komunikimi me kërkuesin.
Përdoruesit e shërbimeve dhe platformave elektronike të KQZ-së	Identifikimi ose autentikimi, administrimi i aplikimit/kërkesës dhe ofrimi i shërbimit përkatës.
Kandidatët, subjektet zgjedhore, organizatat vendase dhe ndërkombëtare dhe persona të tjerë të lidhur me procesin zgjedhor	Përmbushja e detyrimeve dhe kompetencave që burojnë nga Kodi Zgjedhor dhe legjislacioni përkatës.
Kandidatët për punësim, punonjësit dhe ish-punonjësit	Rekrutimi, administrimi i marrëdhënies së punës dhe përmbushja e detyrimeve ligjore të KQZ-së si punëdhënës.
Vizitorët e faqes së internetit	Funksionimi, siguria dhe, sipas rastit, statistikat e përdorimit të faqes.

Për shërbime ose platforma që përfshijnë përpunime specifike ose në shkallë të gjerë, KQZ mund të publikojë edhe njoftime të posaçme privatësie, të cilat plotësojnë këtë politikë.

5. Mbi çfarë baze ligjore përpunohen të dhënat?

Në varësi të veprimtarisë konkrete, KQZ përpunon të dhëna personale kur përpunimi është i nevojshëm për përmbushjen e një detyrimi ligjor, për ushtrimin e funksioneve, detyrave ose kompetencave publike që i janë dhënë KQZ-së me ligj, për lidhjen ose zbatimin e një marrëdhënieje kontraktore, kur është rasti, ose mbi bazën e pëlqimit, vetëm kur pëlqimi përbën bazën e përshtatshme ligjore.

KQZ nuk e përdor pëlqimin si bazë ligjore kur përpunimi është i nevojshëm për ushtrimin e një kompetence ose përmbushjen e një detyrimi të përcaktuar me ligj.

6. Nga i marrim të dhënat?

Në shumicën e rasteve, të dhënat personale merren drejtpërdrejt nga individi.

Në raste të parashikuara nga ligji, KQZ mund të marrë të dhëna edhe nga institucione ose regjistra publikë, nga subjekte zgjedhore ose nga burime të tjera të ligjshme.

Kur të dhënat nuk merren drejtpërdrejt nga individi, KQZ zbaton detyrimet e informimit të përcaktuara nga legjislacioni në fuqi.

7. Kujt mund t’i vihen në dispozicion të dhënat?

KQZ nuk i shpërndan të dhënat personale në mënyrë të pakufizuar.

Të dhënat mund t’u vihen në dispozicion institucioneve publike ose subjekteve të tjera kur kjo kërkohet ose lejohet nga ligji; ofruesve të shërbimeve që përpunojnë të dhëna për llogari të KQZ-së dhe janë të detyruar të zbatojnë kërkesat për konfidencialitet dhe siguri; si dhe palëve të tjera kur ekziston një bazë e vlefshme ligjore.

Kur legjislacioni zgjedhor kërkon publikimin e të dhënave të caktuara, KQZ publikon vetëm informacionin e nevojshëm për përmbushjen e detyrimit ligjor, duke respektuar parimet e anonimizimit dhe proporcionalitetit.

8. Transferimi i të dhënave jashtë Republikës së Shqipërisë

Të dhënat personale që përpunon KQZ ruhen dhe përpunohen brenda territorit të Republikës së Shqipërisë, në infrastrukturën që institucioni disponon.

Nëse në të ardhmen një shërbim teknik ose një përpunues sjell transferimin e të dhënave personale në një vend të huaj ose në një organizatë ndërkombëtare, KQZ zbaton kërkesat dhe garancitë e parashikuara nga ligji nr. 124/2024.

9. Faqja e internetit dhe cookies

Aktualisht, faqja zyrtare e KQZ-së nuk përdor cookies apo teknologji të ngjashme gjurmimi. Nëse në të ardhmen do të bëhet përdorimi i tyre, kjo do të kryhet vetëm në përputhje me legjislacionin në fuqi, dhe informacioni i detajuar mbi kategoritë e cookies, qëllimin, ofruesin dhe kohëzgjatjen e ruajtjes do t’u vihet në dispozicion përdoruesve nëpërmjet kësaj politike ose në një dokumenti të veçantë.

10. Sa kohë i ruajmë të dhënat?

KQZ i ruan të dhënat personale vetëm për aq kohë sa është e nevojshme për qëllimin për të cilin janë mbledhur dhe në përputhje me afatet e përcaktuara nga legjislacioni zgjedhor, legjislacioni për arkivat, legjislacioni për marrëdhëniet e punës dhe nëpunësin civil, si dhe aktet e brendshme për administrimin dhe ruajtjen e dokumentacionit.

Kur nuk ekziston një afat i përcaktuar shprehimisht me ligj, periudha e ruajtjes përcaktohet duke marrë parasysh qëllimin e përpunimit, nevojën administrative, detyrimet ligjore dhe të drejtat e individëve.

Pas përfundimit të periudhës së ruajtjes, të dhënat fshihen, shkatërrohen, anonimizohen ose arkivohen kur ekziston detyrim ligjor për ruajtjen e tyre.

11. Të drejtat tuaja

Në kushtet dhe kufijtë e parashikuar nga ligji nr. 124/2024, ju mund të kërkoni akses në të dhënat tuaja personale, korrigjimin e të dhënave të pasakta ose plotësimin e tyre, fshirjen e të dhënave, kufizimin e përpunimit, kundërshtimin e përpunimit dhe, kur plotësohen kushtet ligjore, transferueshmërinë e të dhënave. Ju keni gjithashtu të drejtën për të mos iu nënshtruar një vendimi të bazuar vetëm në përpunim të automatizuar kur ai sjell pasoja ligjore ose pasoja të ngjashme të rëndësishme.

Jo të gjitha këto të drejta zbatohen në çdo rast. Për shembull, fshirja e të dhënave nuk mund të kërkohet kur KQZ ka detyrim ligjor t’i ruajë ato.

Kërkesat mund t’i drejtohen KQZ-së ose Nëpunësit për Mbrojtjen e të Dhënave Personale. KQZ përgjigjet brenda afateve të përcaktuara nga ligji, si rregull jo më vonë se 30 ditë nga marrja e kërkesës.

12. Vendimmarrja e automatizuar

KQZ nuk merr vendime me pasoja ligjore ndaj individëve bazuar vetëm në përpunimin e automatizuar të të dhënave personale, përveç rasteve kur kjo parashikohet shprehimisht nga ligji.

13. Siguria e të dhënave

KQZ zbaton masa teknike dhe organizative të përshtatshme për të mbrojtur të dhënat personale nga aksesi, përdorimi ose përhapja e paautorizuar, si dhe nga humbja, ndryshimi ose shkatërrimi aksidental apo i paligjshëm.

Masat e sigurisë përcaktohen në bazë të natyrës së të dhënave, qëllimit të përpunimit dhe nivelit të riskut për të drejtat dhe liritë e individëve.

14. E drejta për ankesë

Nëse mendoni se të dhënat tuaja personale janë përpunuar në kundërshtim me legjislacionin në fuqi, mund t’i drejtoheni fillimisht KQZ-së ose Nëpunësit për Mbrojtjen e të Dhënave Personale.

Ju keni gjithashtu të drejtë të paraqisni ankesë pranë:

Komisionerit për të Drejtën e Informimit dhe Mbrojtjen e të Dhënave Personale
E-mail: info@idp.al
Rr. “Abdi Toptani”, Tiranë.

15. Ndryshimet e kësaj politike

KQZ mund ta përditësojë këtë politikë për të reflektuar ndryshime në legjislacion, në veprimtarinë institucionale ose në mënyrën e përpunimit të të dhënave personale.

Versioni: 1.0
Përditësuar më: 3.09.2026