Tiranë, 2 prill 2025 – Komisioneri Shtetëror i Zgjedhjeve, z. Ilirjan Celibashi, zhvilloi sot një bashkëbisedim me përfaqësues të medias, duke dhënë një përditësim mbi përgatitjet për zgjedhjet e 11 majit 2025.

Në lidhje me votimin brenda vendit, ai bëri të ditur se ka filluar procesi i rekrutimit të operatorëve të Pajisjes Elektronike të Identifikimit (PEI) në qendrat e votimit. Deri tani, janë regjistruar rreth 6,500 aplikime për 5,200 qendra votimi, ndërsa numri përfundimtar i tyre do të përcaktohet pas dorëzimit të ekstraktit final të listës së zgjedhësve nga DPGJC. Ai theksoi se është përgatitur një program trajnimi për operatorët e PEI-së dhe po zhvillohet procesi i përgatitjes teknike të pajisjeve për të qenë gati në datën 11 maj.

Lidhur me votimin dhe numërimin elektronik, përgatitjet kanë nisur për Njësinë Administrative nr. 10 në Tiranë dhe për Bashkinë Vorë. Po punohet për përgatitjen e pajisjeve, demonstrimin e fletëve të votimit dhe testimin e sistemeve. Për të informuar dhe familjarizuar qytetarët me procesin e votimit elektronik, në dy javët e ardhshme do të vendosen pajisje në pika kyçe të qytetit të Tiranës dhe Vorës, ku qytetarët mund të testojnë mënyrën dhe procedurat e votimit elektronik. Në këtë kuadër, KQZ ka përgatitur një fushatë informuese që do të shfaqet në median tradicionale dhe rrjetet sociale.

Për sa i përket votimit nga jashtë vendit, të gjitha aspektet rregullatore, logjistike dhe të burimeve njerëzore po ecin sipas kalendarit të përcaktuar. Operator postar i përzgjedhur për shpërndarjen dhe kthimin e fletëve të votimit është “DHL International Albania” SH.P.K, ndërsa shërbimi për votuesit do të jetë falas, pasi kostot mbulohen nga buxheti i shtetit. Kostoja kontraktuale me kompaninë është 9,222,716 euro pa TVSH, ndërsa çmimi mesatar për një dërgesë është 37.52 euro pa TVSH.

Ka nisur edhe procesi i printimit të fletëve të votimit për zgjedhësit jashtë Shqipërisë, të cilat pritet të mbërrijnë në vend më 7-8 prill 2025. Nga data 9-10 prill, do të nisë përgatitja e zarfeve dhe dokumentacionit zgjedhor që do t’u dërgohet votuesve nga jashtë, ndërsa deri më 15-17 prill pritet të përfundojë ky proces. KQZ garanton se, duke respektuar këto afate, zgjedhësit do të kenë kohë të mjaftueshme për të marrë, plotësuar dhe kthyer fletën e votimit.

Në kuadër të informimit të diasporës, KQZ po përgatit një tutorial për procedurën e votimit nga jashtë, si dhe po krijon një sistem ndihmës për votuesit që kanë nevojë për informacion ose sqarime mbi procesin.

Vendi i Numërimit të Votave nga Jashtë do të jetë i vendosur në ambientet e Parkut Olimpik të Tiranës “Feti Borova”, i cili tashmë është gati për këtë proces. Ky ambient do të jetë i hapur për përgatitjen e dokumentacionit zgjedhor dhe do të jetë i aksesueshëm për mediat, vëzhguesit dhe përfaqësuesit e subjekteve zgjedhore. Procesi do të monitorohet përmes kamerave dhe do të transmetohet në kohë reale 24/7 deri në përfundim.

Sa i përket numrit të votuesve nga jashtë, pas vlerësimit të disa kërkesave për ndryshime dhe korrigjimeve teknike, numri përfundimtar i zgjedhësve është 245,935. Në përgjigje të interesit të medias mbi protokollin e dorëzimit të fletëve të votimit nga shërbimi postar, Komisioneri Celibashi sqaroi se ky protokoll mbetet i pandryshuar. Operatorët postarë do të bëjnë tre tentativa për të dorëzuar fletën e votimit në dorë zgjedhësit në adresën e deklaruar, ndërsa në rastet kur dorëzimi nuk kryhet, zgjedhësi mund ta tërheqë personalisht pranë një pike të operatorit postar, duke u identifikuar me dokumentin përkatës.

KQZ mbetet e angazhuar për të siguruar një proces zgjedhor transparent, të ndershëm dhe gjithëpërfshirës.