Këshilli i Evropës ka lançuar zyrtarisht projektin e ri “Mbështetje për Ciklin e Procesit Zgjedhor në Shqipëri (SECA)”, i bashkëfinancuar nga Bashkimi Evropian.

Eventi i lançimit, i organizuar në bashkëpunim me Komisionerin Shtetëror të Zgjedhjeve, mblodhi së bashku përfaqësues të lartë të institucioneve publike, trupit diplomatik, organizatave ndërkombëtare, ekspertëve, shoqërisë civile dhe medias. Ata zhvilluan diskutime të vlefshme mbi sfidat kyçe që ndikojnë procesin zgjedhor dhe riafirmuan angazhimin e tyre të përbashkët për zgjedhje gjithëpërfshirëse, të besueshme dhe transparente.

Eventi përfshiu ndërhyrjet e Sh.T. Ambasador Silvio Gonzato, Shef i Delegacionit të Bashkimit Evropian në Shqipëri; Ilirjan Celibashi, Komisioner Shtetëror i Zgjedhjeve; Liri Kopaçi-Di Michele, Shefe e Divizionit për Bashkëpunimin Parlamentar dhe Zgjedhor në Asamblenë Parlamentare të Këshillit të Evropës; dhe Giulia Re, Shefe e Zyrës së Këshillit të Evropës në Tiranë. Mesazhet kryesore theksuan se reforma e ardhshme zgjedhore në Shqipëri përbën një mundësi jetike për të forcuar profesionalizmin, paanësinë dhe qëndrueshmërinë e administrimit zgjedhor – një proces thelbësor për avancimin e vendit në rrugën e integrimit evropian.

Veprimi SECA fokusohet në forcimin e pavarësisë dhe kapaciteteve institucionale të Komisionit Qendror të Zgjedhjeve (KQZ) dhe në nxitjen e pjesëmarrjes gjithëpërfshirëse të organizatave të shoqërisë civile dhe mediave në proceset zgjedhore. Iniciativa synon të konsolidojë praktika të qëndrueshme në administrimin zgjedhor dhe të forcojë profesionalizmin dhe paanësinë e menaxhimit zgjedhor. Duke vendosur një dialog të strukturuar politikash ndërmjet KQZ-së dhe organizatave të shoqërisë civile, SECA synon të rrisë besimin e publikut në procesin zgjedhor në Shqipëri, në institucionet e tij dhe në legjitimitetin e tyre.

I bashkëfinancuar nga Bashkimi Evropian dhe Këshilli i Evropës dhe i zbatuar nga Këshilli i Evropës, veprimi SECA do të shtrihet për një periudhë 36-mujore, nga korriku 2025 deri në korrik 2028.