Në Ditën e Europës, Komisioni Qendror i Zgjedhjeve mirëpriti një moment të rëndësishëm bashkëpunimi ndërkombëtar: nënshkrimin e Memorandumit të Bashkëpunimit ndërmjet KQZ Shqipëri dhe KQZ Ukrainë. Ceremonia u zhvillua në ambientet e KQZ-së dhe shënoi një hap domethënës drejt forcimit të marrëdhënieve institucionale mes dy administratave zgjedhore.

Memorandumi u nënshkrua nga Komisioneri Shtetëror i Zgjedhjeve dhe Kryetari i KQZ-së së Ukrainës, z. Oleh Didenko, në kuadër të Programit Ndërkombëtar të Vëzhgimit Zgjedhor të organizuar nga KQZ Shqipëri, ku po marrin pjesë përfaqësues të nivelit të lartë nga 12 administrata zgjedhore nga e gjithë bota. Në firmosjen e kësaj marrëveshje të rëndësishme morën pjesë edhe përfaqësues nga International IDEA, si organizatë partnere e trupave zgjedhore të të dy vendeve.

Ky Memorandum parashikon thellimin e bashkëpunimit teknik dhe institucional mes dy institucioneve përmes:

• shkëmbimit të përvojave dhe praktikave të mira në administrimin zgjedhor,
• bashkëpunimit në fushën e edukimit zgjedhor dhe përdorimit të teknologjisë në zgjedhje,
• nismave të përbashkëta për të forcuar integritetin, transparencën dhe besimin e publikut në proceset zgjedhore.

Ky angazhim i përbashkët vjen në një moment të veçantë, jo vetëm për shkak të rëndësisë së Ditës së Europës, por edhe për faktin se Shqipëria është kthyer në një qendër të dialogut dhe shkëmbimit ndërkombëtar mbi demokracinë dhe zgjedhjet.

Komisioneri Celibashi u shpreh se “Jemi të bindur se ky bashkëpunim do të kontribuojë në rritjen e standardeve zgjedhore dhe do të sjellë përfitime konkrete për të dyja vendet, si dhe për partnerët tanë ndërkombëtarë që ndajnë të njëjtat vlera për zgjedhje të lira, të ndershme dhe gjithëpërfshirëse”.