Elvis Çefa vjen në Komisionin e Ankimimeve dhe Sanksioneve në Komisionin Qendror të Zgjedhjeve pas një angazhimi të gjatë në ushtrimin e ligjit dhe administratën publike.
Ai u diplomua Jurist në vitin 1996 dhe në vitin 2011 përfundoi studimet Master i Nivelit të Dytë për të drejtën publike në Fakultetin e Drejtësisë, Universiteti i Tiranës.
Menjëherë pas diplomimit ai nisi rrugëtimin profesional në administratën publike ku fillimisht shërbeu si inspektor dhe Drejtor i Drejtorisë Rajonale Tiranë pranë Kontrollit të Lartë të Shtetit. Në vitin 2000, z. Çefa ka shërbyer për 4 vjet si inspektor në Drejtorinë e Kontrollit Financiar pranë Prefektit Tiranë, dhe më pas ka ofruar shërbimet e tij juridike në pozicione të ndryshme në KLSH, Ministrinë e Brendshme dhe Këshillin e Ministrave.
Në vitin 2010 ai ka drejtuar Agjencinë e Kthimit dhe Kompensimit të Pronave. Në prill 2012, z. Çefa u votua si anëtar i Këshillit të Lartë të Drejtësisë ku ka mbajtur njëkohësisht edhe detyrën e zëvendëskryetarit të KLD-së. Në vitin 2016 ai fillon aktivitetin privat si në ushtrimin e ligjit, si konsulentë, përfaqësues ligjor.
Zoti Çefa në vitin 2017 ka qenë Këshilltar në Kabinetin e Zëvendëskryeministrit.
Elvis Çefa ka lindur më 28 shtator 1973 në Tiranë. Ai është i martuar dhe ka dy fëmijë.