I zgjedhur me vendimin nr. 58/2020 të Kuvendit të Shqipërisë anëtar i Komisionit Rregullator të KQZ-së, Z. Dritan Çaka, vjen në këtë pozicion pas një eksperience shumëvjeçare në administratën publike dhe si avokat.
Përpara se të bëhej anëtar i Komisionit Rregullator, z. Çaka ka shërbyer si Drejtor kabineti dhe Këshilltar në disa shoqëri publike të tilla si OST sh.a, Posta Shqiptare sh.a, AlbGaz sh.a.
Z. Çaka ka një përvojë të gjatë në ushtrimin e ligjit si Avokat duke dhënë konsulenca juridike në fushat penale, civile, administrative. Ai është angazhuar në mësimdhënie në disa universitete jo publike si lektor në disiplina të ndryshme të së drejtës.
Menjëherë pas diplomimit të tij si Jurist në Fakultetin Juridik, Universiteti i Tiranës, z. Çaka ka shërbyer në Avokaturën e Shtetit duke siguruar përfaqësimin e institucioneve shtetërore dhe enteve publike, në gjykata apo arbitrazh ndërkombëtar. Ai është gjyqtar i Dhomës Kombëtare të Zgjidhjes së Konflikteve në federatën Shqiptare të Futbollit. Ai është angazhuar si ekspert i jashtëm pranë Komisionit të Posaçëm parlamentar për realizimin e reformës zgjedhore.