Komisioni i Ankimimeve dhe Sanksioneve shqyrtoi kërkesën ankimore regjistruar nr. 35, datë 22.05.2025, depozituar nga z. Shkëlqim Malevija, me objekt: “Kundërshtimi i Vendimit nr. 1293, datë 19.05.2025, të Komisionerit Shtetëror të Zgjedhjeve, për pushimin e shqyrtimit të denoncimit nr. 175 ID, datë 07.05.2025, për shkelje të ligjit gjatë fushatës zgjedhore dhe mosreferimin e rastit në organet e ndjekjes penale.

Me shumicë votash, KAS vendosi rrëzimin e kërkesës dhe lënien në fuqi të vendimit të KSHZ.

Gjithashtu, KAS nisi shqyrtimin e kërkesës ankimore nr. 37, datë 23.05.2025, depozituar nga Koalicioni Partia Demokratike – Aleanca për Shqipërinë Madhështore, me objekt: “Kundërshtimi i Vendimit Nr. 1309, datë 19.05.2025 - të KSHZ - "Për miratimin e Tabelës Përmbledhëse të Rezultatit të votimit në zonën zgjedhore Qarku Kukës, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025". “Pavlefshmëria e zgjedhjeve të zhvilluara në datën 11 maj 2025 në zonën zgjedhore Qarku – Kukës”. “Zgjidhjen e pasojave duke urdhëruar përsëritjen e zgjedhjeve për Kuvendin e Shqipërisë në të gjithë zonën zgjedhore Qarku Kukës”.

KAS vendosi të administrohen provat: Të dhënat e vëna në dispozicion nga ofruesi i shërbimit postar për votimin nga jashtë sa i takon nënshkrimeve të zgjedhësve në diasporë dhe raportin e audituesve teknicienë mbi verifikimin e veprimeve në bazën e të dhënave të Regjistrit Kombëtar të Gjendjes Civile.

Shqyrtimi i kërkesës ankimore do të vijojë në datën 30 Maj 2025, në orën 10:00.