Sot, Komisioni i Ankimimeve dhe Sanksioneve shqyrtoi kërkesën ankimore nr. 59, datë 29.07.2025, depozituar nga zj. Andia Ulliri, kandidat për deputet i subjektit zgjedhor PD –ASHM, me objekt “Ndryshim i vendimit të datës 28.07.2025, të KSHZ, “Për caktimin e kandidatëve fitues të subjektit zgjedhor Koalicioni PD – ASHM, në zonën zgjedhore Qarku Durrës, për zgjedhjet për Kuvend të datës 11 Maj 2025”.

Në përfundim të shqyrtimit, me pesë vota pro, KAS vendosi rrëzimin e kërkesës ankimore dhe lënien në fuqi të vendimit të Komisionerit Shtetëror të Zgjedhjeve për caktimin e kandidatëve fitues të koalicionit “PD-ASHM” në qarkun Durrës.

Gjithashtu, KAS shqyrtoi kërkesën ankimore nr. 58 Regjistri, datë 28.07.2025, depozituar nga subjekti zgjedhor “Lëvizja Shqipëria Bëhet”, me objekt “Ndryshimi i vendimit nr. 1354, datë 23.07.2025, të Komisionit Qendror të Zgjedhjeve “Për caktimin e kandidatëve fitues të subjektit zgjedhor Koalicioni “Nisma Shqipëria Bëhet”, në zonën zgjedhore Qarku Tiranë, për zgjedhjet për Kuvend të datës 11 Maj 2025”.

Me pesë vota pro, KAS pranoi pjesërisht kërkesën ankimore nr. 58 të subjektit zgjedhor Partia “Lëvizja Shqipëria Bëhet” dhe vendosi ndryshimin e pikës 2 të vendimit të KSHZ nr. 1354/2025, si vijon: “Shpalljen e kandidatit fitues për deputet nga listat shumemërore të miratuara nga Komisioni Qendror i Zgjedhjeve të subjektit zgjedhor Koalicioni “Nisma Shqipëria Bëhet” për Qarkun Tiranë Ana Kosta Dajko”.