Komisioneri Shtetëror i Zgjedhjeve, z. Ilirjan Celibashi bashkëbisedoi me përfaqësuesit e medias lidhur me procesin e hapjes së kutive të fletëve të votimit për qarkun e Tiranës dhe të Fierit, në kuadër të procesit të ankimimeve në Komisionin e Ankimimeve dhe Sanksioneve.

Informacionet e përcjella:

• Procesi i rinumërimit do të realizohet nga stafi i Komisionit Qendror i Zgjedhjeve (jo nga komisionerë politik);
• Procesi i hapjes së kutive të fletëve të votimit ka ardhur si kërkesë e dy anëtarëve të KAS pas vlerësimit të pretendimeve të subjekteve zgjedhore dhe kandidatëve për deputetë, pretendime të bazuara në të gjithë dokumentacionin dhe pamjet filmike të vëna në dispozicion nga KQZ.
• Sistemi i administrimit dhe mbikëqyrjes së numërimit dhe tabelimit të rezultatit të zgjedhjeve ka funksionuar ashtu sikurse do të duhet funksiononte sepse bazuar në ato të dhëna dhe pamje filmike iu është krijuar mundësia kandidatëve për të ngritur ato pretendime që kanë ngritur.
• Mbetet për tu parë se sa qëndrojnë këto pretendime pas rivlerësimit që do t’i bëhet këtij procesi, i cili është kompetencë e Komisionit të Ankimimeve dhe Sanksioneve. Do të jetë KAS që do të disponojë dhe vendosë për çdo element të këtij procesi.
• Do të rinumërohen 610.301 vota për qarqet e Tiranës dhe Fierit.
• Procesi do të fillojë ditën e Hënë ose të Martë, datë 16-17.06.2025.
• Është dashur rreth një javë kohë për përgatitjen e infrastrukturës, logjistikës dhe burimeve njereëzore të këtij procesi.
• Procesi do të zhvillohet në ambientet e Pallatit të Sportit “Farie Hoti”.
• Është parashikuar që të ngrihen 24/25 grupe numërimi të përbërë nga dy anëtarë të stafit të KQZ-së (pjesa më e madhe staf i përhershëm, por do të ketë angazhim dhe nga stafi i përkohshëm).
• Për çdo tavolinë numërimi do të ketë transmetim online në kohë reale të procesit.
• Ambientet e Pallatit të Sportit “Farie Hoti” do të jenë të monitoruara nga kamerat 24/7, dhe do të ketë transmetim në kohë reale të këtij monitorimi.
• Parashikohet që për qarkun e Tiranës dhe të Fierit ky proces të zgjasë 18-20 ditë.

Lidhur me kohëzgjatjen që do të marrë procesi i rinumërimit, Komisioneri solli në vëmendje disa të dhëna të procesit të numërimit pas ditës së votimit:

• Për qarkun e Tiranës janë angazhuar 208 grupe numërimi në 104 tavolina.
• Për qarkun e Fierit janë angazhuar 92 grupe numërimi në 46 tavolina.

Komisioneri tha se për procesin e rinumërimit do të jenë gati 6 herë më pak tavolina dhe si rrjedhojë do të duhet rreth 6 herë më tepër kohë se sa u është dashur numëruesve të partive politike për të tabuluar rezultatin.

Sa i përket kostove financiare që implikon ky proces, KSHZ Celibashi theksoi se është duke përfunduar vlerësimin e plotë të këtij komponenti, por nuk do të angazhojë fonde shtesë. KQZ nuk do të kërkojë fonde shtesë për këtë proces pasi janë kursyer mjaftueshëm fonde, rreth 3 milionë euro nga procesi i votimit nga jashtë dhe aspekte të tjera të procesit të zgjedhjeve në tërësi.

Komisioneri Celibashi nënvizoi se për sa kohë procesi është duke u kryer në përputhje me parashikimet e ligjit si në formë dhe në përmbajtje, ofrimi i transparencës dhe sqarimi i çdo pretendimi është gjithmonë më mirë dhe me dobi.

Interesit të gazetarëve lidhur me procesin e votimit nga jashtë, KSHZ tha se ka shkuar shumë mirë, ndonëse ka patur problematika, të cilat do të duhet të adresohen për zgjedhjet e ardhshme. Duke llogaritur edhe efektin e problematikave, theksoi ai ky procesi i votimit nga jashtë është zhvilluar në mënyrë model. Episodet e shpërndarjes së zarfeve, veçanërisht ato në shtetin e Greqisë, assesi nuk e cënojnë këtë proces për mënyrën se si u organizua dhe u administrua nga KQZ.

“KQZ ka patur përgjegjësinë e përzgjedhjes së operatorit të shërbimit postar dhe mendojmë që kemi zgjedhur një nga dy operatorët më të mirë në botë, më të besuar në kuptim të integritetit, cilësisë dhe profesionalizimit. Jemi përpjekur të paguajmë sa më pak para të mundshme për shërbimin dhe kemi dakordësuar përpilimin e një kontrate shumë të mirë me shërbimin postar. Këtu përfundon përgjegjësia e KQZ-së në një lloj mënyre. Procesi nuk ka përfunduar akoma, jemi në momentet e vlerësimit të përmbushjes së detyrimeve kontraktuale të këtij operatori. Në përputhje me gjetjet do të disponohet edhe mbi pagesën e merituar për shërbimin e kryer. Por janë dëshmitarë me mijëra votues të cilët konfirmojnë atë çfarë thashë në lidhje me realizimin e këtij procesi pasi kanë marrë dhe kanë kthyer sërish fletët e votimit në KQZ”.

KSHZ deklaroi së çfarë ka qenë në kompetencë të KQZ-së është kryer në përputhje me ligjin, me përfshirjen e partive politike që në momentin zero të këtij procesi, në transparencë të plotë për partitë, mediat, publikun.