Komisioni Qendror i Zgjedhjeve në bashkëpunim me International IDEA dhe Qendra e Sundimit të Ligjit, Universiteti i Helsinkit (University of Helsinki), organizuan konferencën “Ndërtimi i besimit në votime: Financimi politik dhe Reforma Zgjedhore në Shqipëri”.

Në këtë tryezë, Komisioneri Shtetëror i Zgjedhjeve, z. Ilirjan Celibashi së bashku me zj. Tuija Brax, Drejtoreshë e Qendrës së Sundimit të Ligjit, Universiteti i Helsinkit, z. Sam Van Der Staak, Drejtor i Programit Rajonal i Europës, International IDEA, Sh.T.Z Silvio Gonzato, Ambasador i Bashkimit Evropian në Shqipëri dhe bashkëkryetarët e Komisionit Ad-Hoc të Reformës Zgjedhore në Kuvendin e Shqipërisë, z. Damian Gjiknuri dhe z. Oerd Bylykbashi analizuan arritjet, mësimet e nxjerra dhe sfidat që lidhen me financimin e partive politike dhe proceset zgjedhore.

Konferenca ofroi një mundësi për të vlerësuar punën e kryer duke nxitur një dialog të hapur ndërmjet vendimmarrësve, ligjvënësve, autoriteteve zgjedhore, shoqërisë civile dhe partnerëve ndërkombëtarë me fokus të orientuar drejt reformës së ardhshme zgjedhore.

U shkëmbyen ide mbi mënyrat se si Shqipëria mund të modernizojë kuadrin e financimit të politikës, për të forcuar qëndrueshmërinë demokratike dhe besimin publik.

U prezantuan gjetjet paraprake të Studimit të Vlerësimit të Financimit Politik për Shqipërinë, i cili shqyrton kuadrin rregullator me një fokus të veçantë te të rinjtë dhe grupet e nënpërfaqësuara dhe qasjen e tyre në financimin e partive dhe të fushatave. Gjetje të cilat do të shërbejnë si bazë për një diskutim mbi pengesat dhe mundësitë për një pjesëmarrje politike më gjithëpërfshirëse.

Debatet e kësaj konference i shërbejnë të gjithë aktorëve të përfshirë në proceset zgjedhore për të përcaktuar rekomandimet dhe hapat e ardhshëm në fushën e financimit politik dhe reformës zgjedhore në kuadër të rrugëtimit të Shqipërisë drejt Bashkimit Europian.

Aktiviteti shërbeu gjithashtu si një platformë për shkëmbim rajonal, duke sjellë përvoja dhe perspektiva nga Kosova dhe Mali i Zi.

Aktiviteti vjen në kuadër të projektit "Integriteti dhe Besimi në Zgjedhjet Shqiptare: Nxitja e Transparencës së Financave Politike dhe Përdorimit të Sigurt të Teknologjive të Informacionit dhe Komunikimit", i ndërmarrë nga International IDEA dhe Qendra e Ligjit e Finlandës me përfitues të drejtpërdrejtë Komisionin Qendror të Zgjedhjeve.

Fjala e plotë e Komisionerit Shtetëror të Zgjedhjeve, Ilirjan Celibashi.