Sot, Komisioneri Shtetëror i Zgjedhjeve, z. Ilirjan Celibashi mori pjesë në takimin konsultues mbi Reformën Zgjedhore, me fokus në rolin e qytetarëve dhe të shoqërisë civile në procesin e hartimit, propozimit dhe miratimit të një legjislacioni të ri zgjedhor.

Ky takim u organizua nga “Veprimi Qytetar”, iniciativë qytetare e përbërë nga aktivistë dhe profesionistë të angazhuar për ndërtimin dhe forcimin e një demokracie funksionale në Shqipëri përmes rritjes së pjesëmarrjes qytetare dhe promovimit të reformave institucionale me integritet.

Në panelin e diskutimeve, KSHZ solli në vëmëndje rëndësinë e realizimit të reformës zgjedhore më kohë.

“Zgjedhjet për organet e qeverisjes vendore të vitit 2027 janë shumë afër dhe kryerja e reformës zgjedhor në momentin e fundit prodhon pasiguri dhe mosbesim të të gjithë aktorëve në proces. Theksoj se partitë politike është rasti të tejkalojnë dallimet antagoniste që kanë dhe të punojnë për reformën zgjedhore. Është në interesin e partive politike edhe në interesin e qytetarëve, por edhe të KQZ-së si institucioni që merret me organizimin e zgjedhjeve, që rregullat e zgjedhjeve të jenë të qarta kohë përpara se procesi zgjedhor të zhvillohet” tha Celibashi.

Komisioneri shprehu gadishmërinë që KQZ ka dhe do të ketë për të bashkëpunuar ngushtë me të gjithë organizatat e shoqërisë civile për të patur produkt/propozime të përbashkëta me konsensusin e të gjithëve.

Gjatë diskutimeve, të pranishmit trajtuan disa nga çështjet që Reforma Zgjedhore duhet të adresojë si:

• Financimi i partive politike;
• Veprimtaria e Institucionet Publike gjatë fushatave zgjedhore;
• Votimi & Numërimi Elektronik;
• Votimi nga Jashtë (Diaspora):
• Referendumet: Krijimi i rregullave të plota;
• Rishikim i Ligjit për Partitë Politike; e të tjerë.