KQZ dhe DPGJC diskutojnë përgatitjet për listat e zgjedhësve për zgjedhjet vendore të 9 majit 2027

Komisioni Qendror i Zgjedhjeve dhe Drejtoria e Përgjithshme e Gjendjes Civile (DPGJC) zhvilluan një takim pune në kuadër të përgatitjeve për zgjedhjet për organet e qeverisjes vendore të datës 9 maj 2027.

Në fokus të takimit ishte zbatimi i Udhëzimit nr. 220, datë 4.11.2026, për procedurat e hartimit të listave të zgjedhësve, në kushtet e ndarjes së re administrativo-territoriale të njësive të qeverisjes vendore.

Gjatë diskutimeve u trajtuan çështje që lidhen me:

• Përshtatjen e Regjistrit Kombëtar të Gjendjes Civile me ndarjen e re territoriale dhe gjenerimin e ekstrakteve të përbërësve zgjedhorë sipas bashkive të reja;
  • Saktësimin e procedurave për përgatitjen, firmosjen dhe afishimin e ekstrakteve të listave të zgjedhësve;
  • Verifikimin dhe standardizimin e adresave të qendrave të votimit, si dhe unifikimin e të dhënave në formularët e listave të zgjedhësve;
  

Palët diskutuan mbi nevojën e koordinimit institucional dhe marrjen e masave të nevojshme në kohë, me qëllim garantimin e një procesi të saktë dhe të njëtrajtshëm të hartimit dhe publikimit të listave të zgjedhësve, në përputhje me kuadrin ligjor në fuqi.

Publikimi i ekstraktit të parë të listave të zgjedhësve është parashikuar deri më 30 nëntor 2026.