Komisioni Qendror i Zgjedhjeve ka nisur një seri takimesh strategjike me të gjithë partnerët e shoqërisë civile, për të projektuar një proces zgjedhor më gjithëpërfshirës dhe të informuar.

KQZ bashkëbisdeoi me përfaqësues të Institutit të Kulturës Rome në Shqipëri, Prezencës së OSBE-së në Shqipëri, Institutit Ndërkombëtar për Demokraci dhe Asistencë Zgjedhore (International IDEA), Fondacionit Westminister për Demokraci, Un Women, Rrjetit Shqiptar për Fuqizimin e Grave (AËN), Organizatës “Qendresa Qytetare “, Komitetit Shqiptar të Helsinkit.

Në fokus të diskutimeve ishin çështje kyçe për forcimin e proceseve demokratike dhe rritjen e besimit të qytetarëve te zgjedhjet, konkretisht:

• Edukimi i zgjedhësve me metoda innovative;
• Fuqizimi i zërit të çdo target-grupi;
• edukimi i vazhdueshëm mbi rëndësinë e pjesëmarrjes në zgjedhje;
• rritja e pjesëmarrjes dhe përfaqësimit të grave në proceset zgjedhore;
• rritja e transparencës në financimin e partive politike;
• ndërgjegjësimi dhe informimi i qytetarëve mbi krimet zgjedhore, e të tjerë.

U shkëmbyen ide mbi rëndësinë e edukimit zgjedhor dhe nevojën për informim të vazhdueshëm të qytetarëve, veçanërisht të grupeve specifike, si minoritetet, gratë, të rinjtë dhe personat me aftësi të kufizuara.

Gjatë diskutimeve u theksua se një bashkëpunim i strukturuar dhe i qëndrueshëm ndërmjet institucioneve dhe organizatave të shoqërisë civile është thelbësor për garantimin e një procesi zgjedhor transparent, gjithëpërfshirës dhe demokratik.

Ndaj, u dakordësua për rritjen e përpjekjeve të përbashkëta për ndërgjegjësimin e qytetarëve përmes ofrimit të informacionit të qartë, të saktë dhe të lehtë për t’u kuptuar nga të gjitha kategoritë e zgjedhësëve.