Sot, Komisioni Rregullator miratoi disa shtesa dhe ndryshime në vendimin nr. 22, datë 20.3.2025, të Komisionit Rregullator “Për rregullat për administrimin, numërimin dhe vlerësimin e votave nga jashtë territorit të Republikës së Shqipërisë, dokumentacionin përkatës, si dhe tabelimin e rezultatit të votimit nga jashtë vendit”.

Shtesat dhe ndyshimet kanë për qëllim përcaktimin më të qartë të procedurës së administrimit dhe vlerësimit të dokumentacionit zgjedhor që vjen nga jashtë territorit të Republikës së Shqipërisë, si dhe qartësimin e dispozitave ekzistuese për të shmangur mundësinë e interpretimit të dyfishtë dhe për të garantuar standarde të barabarta në trajtimin e dokumentacionit zgjedhor.

Ndryshimet reflektojnë nevojën për qartësi më të madhe në procedurat e administrimit të dokumentacionit zgjedhor, si dhe unifikim të trajtimit të zarfeve dhe fletëve të votimit në të gjitha kutitë përkatëse.

Gjithashtu, u miratua udhëzuesi i punës së Komisionet e Administrimit, Numërimit dhe Vlerësimit të Votave nga Jashtë (KANVVJ) dhe Grupeve të Numërimit të Votave nga Jashtë (GNVJ), për zgjedhjet për Kuvend.

Udhëzuesi ka për qëllim:

• të sigurojë një proces të rregullt, transparent dhe të drejtë të administrimit dhe numërimit të votave që vijnë nga shtetasit shqiptarë që votojnë jashtë territorit të Republikës së Shqipërisë.
• të përcaktojë detyrat dhe përgjegjësitë e anëtarëve të KANVVJ dhe GNVJ në çdo fazë të procesit zgjedhor që lidhet me votat nga jashtë.
• të japë udhëzime të qarta për mënyrën se si do të zhvillohet administrimi, numërimi dhe vlerësimi i votave, për të shmangur pasiguri apo interpretim të ndryshëm nga grupet përkatëse.