Komisioni i Ankimimeve dhe Sanksioneve në përfundim të shqyrtimit, me shumicë votash vendosi rrëzimin e kërkesave e tre kërkesave ankimore:

1. Nr. 38, depozituar nga Koalicioni Partia Demokratike – Aleanca për Shqipërinë Madhështore, me objekt: “1. Kundërshtimi i Vendimit Nr. 1319, datë 22.05.2025 - të KSHZ - "Për miratimin e Tabelës Përmbledhëse të Rezultatit të votimit në zonën zgjedhore Qarku Berat, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025”. 2. Pavlefshmëria e zgjedhjeve të zhvilluara në datën 11 maj 2025 në zonën zgjedhore Qarku – Berat.3. Zgjidhjen e pasojave duke urdhëruar përsëritjen e zgjedhjeve për Kuvendin e Shqipërisë në të gjithë zonën zgjedhore Qarku Berat”.
2. Nr. 39, datë 27.05.2025, depozituar nga Koalicioni Partia Demokratike – Aleanca për Shqipërinë Madhështore, me objekt: “1. Kundërshtimi i Vendimit Nr. 1316, datë 23.05.2025 - të KSHZ - "Për miratimin e Tabelës Përmbledhëse të Rezultatit të votimit në zonën zgjedhore Qarku Vlorë, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025”. 2. Pavlefshmëria e zgjedhjeve të zhvilluara në datën 11 maj 2025 në zonën zgjedhore Qarku – Vlorë. 3. Zgjidhjen e pasojave duke urdhëruar përsëritjen e zgjedhjeve për Kuvendin e Shqipërisë në të gjithë zonën zgjedhore Qarku Vlorë” dhe
3. Nr. 43, datë 29.05.2025, depozituar nga Koalicioni Shqipëria Bëhet, me objekt: “1. Kundërshtimi i vendimit nr. 1316, datë 23.05.2025 të KSHZ "Për miratimin e Tabelës Përmbledhëse të Rezultatit të votimit në zonën zgjedhore Qarku Vlorë, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025. 2. Rinumërimi i votave për këtë qark” që u shqyrtua bashkërisht me kërkesën ankimore nr. 39.

KAS vendosi lënien në fuqi të vendimeve nr. 1319/2025 dhe nr. 1316/2025 të KSHZ.

Gjithashtu, vijoi shqyrtimi i kërkesës ankimore nr. 45, depozituar nga Koalicioni Partia Demokratike – Aleanca për Shqipërinë Madhështore me objekt: “1. Kundërshtimi i vendimit Nr. 1327, datë 23.05.2025, të KSHZ "Për miratimin eTabelës Përmbledhëse të Rezultatit të votimit në zonën zgjedhore Qarku Durrës, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025". 2. Pavlefshmëria e zgjedhjeve të zhvilluara në datën 11 maj 2025 në zonën zgjedhore Qarku Durrës. 3. Zgjidhjen e pasojave duke urdhëruar persëritjen e zgjedhjeve për Kuvendin e Shqipërisë në të gjithë zonën zgjedhore Qarku Durrës”.

Me shumicë votash, KAS vendosi rrëzimin e kërkesës të subjektit zgjedhor Partia Demokratike – Aleanca për Shqipërinë Madhështore për hapjen e kutive, si të pa mbështetur në ligj. Po ashtu, vendosi rrëzimin edhe për kërkesën ankimore të paraqitur nga subjekti Partia Lëvizja e Legalitetit për hapjen e kutive të votimit në të gjithë ZAZ Durrës, me arsyetimin se, edhe nëse gjetjet e provuara para KAS nga subjekti ankimues do të merren të mirëqena, ato nuk ndikojnë në rezultatin përfundimtar të zgjedhjeve.

Ndërkohë, bazuar në nenin 136, pika 3 e Kodit Zgjedhor, anëtarët Elvis Çefa dhe Ledio Braho kërkuan që të bëhet hapja e kutive të votimit dhe atyre të materialeve zgjedhore sipas kërkesës së Koalicionit PD-ASHM, të KZAZ nr. 21 dhe KZAZ nr. 22 të qarkut Durrës, si edhe kutitë e votimit dhe materialeve zgjedhore për 126 QV-të e renditura në materialin e paraqitur në KAS nga ky subjekt. Sa i përket kërkesës së PLL, dy anëtarët kërkuan gjithashtu hapjen e 60 kutive të votimit pretenduara nga Partia Lëvizja e Legalitetit.

Gjithashtu, për qarkun Durrës, u kërkua të hapen edhe kutitë e votave të ardhura nga diaspora.

Ndërkohë shqyrtimi i kërkesës ankimore nr. 56, për qarkun e Elbasanit do të vijojë në seancën e ditës së Premte, datë 13.06.2025.