Sot, Komisioneri Shtetëror i Zgjedhjeve vlerësoi raportin mbi veprimtaritë publike për periudhën 9 mars – 15 mars 2025 dhe vendosi fillimin e shqyrtimit administrativ ndaj Agjencisë Kombëtare të Arsimit Parauniversitar dhe Bashkisë Vlorë.

Komisioneri Celibashi vlerësoi edhe raportet e monitoruesve të fushatës zgjedhore për periudhën e monitorimit 10 mars – 16 mars 2025. Monitoruesit nuk kanë konstatuar shkelje.

Në përfundim të shqyrtimit të kërkesës së Partisë Demokratike për heqjen e simboleve, stemave dhe logove jo zyrtare të PD nga një ambient privat, KSHZ vendosi urdhërimin e Policisë Bashkiake Tiranë dhe Policisë së Shtetit për heqjen e materialeve propagandistike nga ambienti privat në njësinë administrative nr. 8, rruga Ali Pashë Gucia brenda 10 (dhjetë) ditëve.

Në seancën e sotme publike u përcaktua sasia e fondit nga buxheti i shtetit që do t’u shpërndahet partive politike pjesëmarrëse në zgjedhjet për Kuvend, të datës 11 maj 2025.

Fondi prej 131.201.816 lekë do të shpërndahet për 11 subjektet zgjedhore si më poshtë vijon:

1. Partia Demokratike (PD) 44.818.545 lekë
2. Partia Republikane (PR) 2.689.112,70 lekë
3. Partia Lëvizja për Zhvillim Kombëtar (LZHK) 896.370,90 lekë
4. Partia Socialiste e Shqipërisë (PS) 65.291.390 lekë
5. Partia e Lirisë (PL) 9.140.730 lekë
6. Partia Drejtësi, Integrim dhe Unitet (P.D.I.U) 1.792.735 lekë
7. Partia Bashkimi për të Drejtat e Njeriut (PBDNJ) 896.370,90 lekë
8. Partia Agrare Ambjentaliste (PAA) 896.370,90 lekë
9. Partia Lëvizja e Legalitetit (PLL) 896.370,90 lekë
10. Partia Socialdemokrate (PSD) 3.015.375 lekë
11. Partia Nisma Thurje (NISMA) 868.445 lekë

Gjithashtu, u shqyrtuan administrativisht denoncimet nr. 38 ndaj Kryetarit dhe Sekretarit të Këshillit të Bashkisë Fier, nr. 39 ndaj Kryetarit të Bashkisë Elbasan, nr. 40 ndaj Kryetarit të Bashkisë Lezhë të depozituara nga Komitetit Shqiptar të Helsinkit. Vendimet do të shpallen në seancën e ardhshme.

Nga çështjet e mbartuara, u shqyrtuan administrativisht denoncimet:

1. Nr. 12, ndaj Kryetarit të Kuvendit, të depozituar prej Institutit të Studimeve Politike”.

2. Nr. 47, ndaj Kryetarit të Kuvendit, Kryetarit të Bashkisë Peqin, Belsh, Elbasan, Vlorë, Himarë, të depozituar nga "Qëndresa Qytetare”.

3. Nr. 24, ndaj Drejtorit të Përgjithshëm të Administratës së Kopshteve dhe Çerdheve, të Bashkisë Tiranë dhe Bashkisë Tiranë, të depozituar nga Koalicionit për Reforma Integrim dhe Institucione të Konsoliduara (KRIIK).

Vendimet do të shpallen në seancat vijuese.

Ndërkohë shqyrtimi administrativ me nr. 55, të depozituar nga "Qëndresa Qytetare” ndaj Kryeministrit, Sekretarit të Përgjithshëm të Këshillit të Ministrave dhe Bashkisë Tiranë, u shty pas kërkesës së Bashkisë Tiranë.