Sot, Komisioni i Ankimimeve dhe Sanksioneve përfundoi shqyrtimin e katër kërkesave ankimore për zgjedhjet për Kuvend të datës 11 maj 2025, në qarqet Elbasan, Fier, Tiranë dhe Durrës.

KAS me shumicë votash, mbështetur në nenit 21, pika 1, shkronja “b”, të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar, vendosi rrëzimin e kërkesës ankimore nr. 56 të subjektit zgjedhor Koalicioni “Partia Demokratike - Aleanca për Shqipërinë Madhështore” për shpalljen e pavlefshme të zgjedhjeve në zonën zgjedhore qarku Elbasan, si të pambështetur në ligj dhe në prova. Gjithashtu, vendosi ndryshimin e vendimit të Komisionerit Shtetëror të Zgjedhjeve nr. 1328, datë 24.05.2025 “Për miratimin e Tabelës Përmbledhëse të Rezultatit të votimit në zonën zgjedhore qarku Elbasan, në zgjedhjet për Kuvendin të datës 11 maj 2025”, sipas rezultateve të dala nga kqyrja e kutive të materialeve zgjedhore gjatë procesit ankimor.

Në përfundim të shqyrtimit të kërkesës nr. 47, depozituar nga Koalicioni Partia Demokratike – Aleanca për Shqipërinë Madhështore, KAS me shumicë votash, mbështetur në nenit 21, pika 1, shkronja “b”, të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar, vendosi rrëzimin e kërkesës ankimore për shpalljen e pavlefshme të zgjedhjeve në zonën zgjedhore qarku Fier, si të pambështetur në ligj dhe në prova.

KAS me shumicë votash vendosi pranimin e kërkesës ankimore nr. 43 të depozituar nga koalicioni “Nisma Shqipëria Bëhet”, për kundërshtimin e vendimit nr. 1317/2025, të KSHZ - "Për miratimin e Tabelës Përmbledhëse të Rezultatit të votimit në zonën zgjedhore Qarku Fier, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025”, si edhe ndryshimin e vendimit të Komisionerit nr. 1317/2025 dhe pasqyrimin e rezultateve të rinumërimit dhe rivlerësimit të votave për këtë zonë zgjedhore gjatë procesit ankimor.

Mbështetur në nenit 21, pika 1, shkronja “b”, të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar, Komisioni i Ankimimeve dhe Sanksioneve, me shumicë votash, vendosi rrëzimin e kërkesës ankimore nr. 48 të subjektit zgjedhor Koalicioni “Partia Demokratike - Aleanca për Shqipërinë Madhështore” për shpalljen e pavlefshme të zgjedhjeve të zhvilluara në zonën zgjedhore qarku Tiranë, si të pambështetur në ligj dhe në prova. Gjithashtu, vendosi ndryshimin e vendimit të KSHZ nr. 1326/2025 “Për miratimin e Tabelës Përmbledhëse të Rezultatit të votimit në zonën zgjedhore qarku Tiranë, në zgjedhjet për Kuvendin të datës 11 maj 2025”, sipas rezultateve të dala nga rinumërimi dhe rivleresimi i votave të kryer gjatë procesit ankimor për këtë qark.

Në seancën e sotme publike, mbështetur në nenit 21, pika 1, shkronja “b”, të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar, KAS me shumicë votash, vendosi rrëzimin e kërkesës ankimore nr. 45 të subjektit zgjedhor Koalicioni “Partia Demokratike - Aleanca për Shqipërinë Madhështore” për shpalljen e pavlefshme të zgjedhjeve të zhvilluara në zonën zgjedhore qarku Durrës, si të pambështetur në ligj dhe në prova. KAS pranoi pjesërisht kërkesën ankimore nr. 54 të depozituar nga subjekti zgjedhor Partia “Lëvizja e Legalitetit”, për kundërshtimin e vendimit nr. 1327/2025 - të KSHZ - "Për miratimin e Tabelës Përmbledhëse të Rezultatit të votimit në zonën zgjedhore Qarku Durrës, për subjektet zgjedhore dhe kandidatët për deputetë në zgjedhjet për Kuvendin të datës 11 maj 2025” dhe vendosi ndryshimin e vendimit nr. 1327 dhe reflektimin e rezultateve të rinumërimit dhe rivlerësimit të votave të kryer gjatë procesit ankimor.