Komisioni Qendror i Zgjedhjeve (KQZ), në bashkëpunim me organizatën “Qëndresa Qytetare”, zhvilloi një seminar për përmirësimin e mekanizmave të monitorimit të fushatave zgjedhore dhe të hetimit administrativ.

Në këtë aktivitet morën pjesë anëtarë të organeve drejtuese të KQZ-së dhe përfaqësues të organizatave të shoqërisë civile që veprojnë në fushën e zgjedhjeve. Takimi u shfrytëzua si një platformë e strukturuar për diskutim dhe shkëmbim përvojash.

Qëllimi kryesor ishte identifikimi i vështirësive të zbuluara në zgjedhjet e kaluara dhe prezantimi i propozimeve konkrete për forcimin e monitorimit të fushatave zgjedhore dhe të procesit të hetimit administrativ.

Gjatë punimeve u diskutuan tema të rëndësishme, si:

• Rekrutimi, trajnimi dhe certifikimi i monitoruesve të KQZ-së.
• Metodologjia e monitorimit të fushatës zgjedhore.
• Krijimi i një sistemi të aksesueshëm për gjurmueshmërinë e ankesave.
• Rregullat e sjelljes gjatë periudhës zgjedhore.
• Masat për parandalimin e keqpërdorimit të burimeve publike.

Përmirësimi i këtyre mekanizmave synon ta bëjë monitorimin e procesit zgjedhor më efektiv, transparent dhe parandalues, duke kontribuar në rritjen e besueshmërisë dhe integritetit të zgjedhjeve.

Të gjitha sugjerimet dhe rekomandimet e paraqitura nga "Qendresa Qytetare" dhe organizatat e tjera të shoqërisë civile do të merren parasysh nga KQZ gjatë rishikimeve të kuadrit ligjor për zgjedhjet e ardhshme.