Mikpritëm në Komisionin Qendror të Zgjedhjeve studentët e Fakultetit të Drejtësisë, Univerisiteti i Tiranës për të bashkëbiseduar mbi votimin nga jashtë të realizuar në zgjedhjet për Kuvend të datës #11maj2025.

Puna e KQZ-së për organizimin dhe administrimin e procesit të votimit nga jashtë ishte tema kryesore me të cilën u njohën studentët.

Vëmendje dhe interes të veçantë mori procesi i regjistrimit të zgjedhësve nga jashtë, funksionimi i Platformës Elektronike të Regjistrimit (PER), përgatitja e dokumentacionit zgjedhor, si edhe administrimi, numërimi dhe vlerësimi i votës së diasporës.

Administrata e KQZ-së i’u përgjigj interesit të studentëve lidhur me problematikat e hasura gjatë këtij procesi, i cili u zhvillua për herë të parë në vendin tonë, dhe për mesimet e nxjerra nga kjo eksperiencë.

Bashkëbisedimi me studentët arriti qëllimin për rritjen e njohurive të studentëve sa i përket procesit të votimit nga jashtë të shqiptarëve që jetojnë përtej territorit të Republikës së Shqipërisë.

Takimi u zhvillua në kuadër të javës mësimore “Vota e diasporës dhe procesi zgjedhor në Shqipëri: Sfidat dhe mundësitë për një demokraci të përfshirë”, që është duke u zhvilluar në Fakultetin e Drejtësisë, UT.