Sot, Komisioneri Shtetëror i Zgjedhjeve, z. Ilirjan Celibashi dhe Zyra e Këshillit të Evropës në Tiranë pritën organizatat fituese të granteve të projektit SECA, shtatë konsorciume të shoqërisë civile, me fusha, ide dhe prioritete të ndryshme.

Në panel ishin edhe znj. Liri Kopaci-Di-Michele, Drejtuese e Divizionit të Bashkëpunimit Parlamentar dhe Zgjedhor të Këshillit të Evropës, dhe z. Stefano Varriale, nga Delegacioni i Bashkimit Evropian në Tiranë.

Takimi ndryshoi rolet e zakonshme. Këtë herë nuk foli vetëm institucioni, folën organizatat ku secila prezantoi projektin e saj dhe tha qartë çfarë pret nga KQZ.

Gjatë takimit u diskutua mbi rëndësinë e forcimit të dialogut dhe bashkëpunimit ndërmjet KQZ-së dhe organizatave të shoqërisë civile, me synim rritjen e transparencës, gjithëpërfshirjes dhe besimit të publikut në proceset zgjedhore.

Takimi konsultativ me përfaqësues të organizatave të shoqërisë civile (OJF), u zhvillua në kuadër të projektit“Mbështetje për Ciklin e Procesit Zgjedhor në Shqipëri”, i cili bashkëfinancohet nga Bashkimi Evropian dhe Këshilli i Evropës.