Komisioni miratoi rregullat e procedurës së mbledhjes së nënshkrimeve për referendumet në Republikën e Shqipërisë.
Ky vendim synon të garantojë zhvillimin e një procedure të qartë, transparente, të standardizuar dhe të zbatueshme në praktikë, duke siguruar respektimin e parimeve të ligjshmërisë, barazisë së qytetarëve përpara ligjit, integritetit të procesit dhe mbrojtjes së të dhënave personale të zgjedhësve.
Synohet gjithashtu unifikimi i praktikave administrative që lidhen me administrimin e formularëve të nënshkrimeve, mënyrën e identifikimit të mbështetësve, procedurat e dorëzimit, si dhe detyrimet e subjekteve përgjegjëse për administrimin e procesit.
Akti i miratuar sot, rregullon procedurat për mbledhjen e nënshkrimeve në kuadër të referendumeve, duke përcaktuar vendet e autorizuara për zhvillimin e këtij procesi, si dhe kërkesat lidhur me formën, përmbajtjen dhe mënyrën e administrimit e plotësimit të fletëve të nënshkrimeve.
Në mënyrë të veçantë, përcaktohet përdorimi i detyrueshëm i fletëve tip të miratuara nga Komisioni Qendror i Zgjedhjeve, përmbajtja e tyre, të dhënat identifikuese që duhet të plotësohen nga zgjedhësit, si dhe elementet që lidhen me identifikimin dhe përgjegjësinë e anëtarëve të grupit të mbledhjes së nënshkrimeve.