KSHZ takon Ambasadoren e BE-së në Shqipëri: Në fokus - Reforma zgjedhore dhe mbështetja e për KQZ

Komisioneri Shtetëror i Zgjedhjeve, z. Ilirjan Celibashi mikpriti sot në KQZ Ambasadoren e Bashkimit Evropian në Shqipëri, znj. Sofia Moreira de Sousa.

Ambasadorja theksoi se Shqipëria po ecën në drejtimin e duhur drejt anëtarësimit në BE, por etapa e fundit është më e vështira. Afatet janë ambicioze dhe vendit i duhet të bëjë shumë më tepër në më pak kohë. Ajo theksoi gjithashtu se Shqipëria ka gjithçka që i duhet për të arritur rezultatet. Sipas saj, rekomandimet e ODIHR-it duhet të zbatohen pas një debati të mirëfilltë, dhe reforma zgjedhore duhet të ndodhë sa më shpejt.

Ambasadorja ripohoi gatishmërinë e Bashkimit Evropian për ta mbështetur KQZ-në. Ajo kërkoi të identifikohen fushat ku ndërhyrja dhe asistenca e BE-së do t'i jepnin më shumë vlerë punës së institucionit.

KSHZ fa;enderoi Bashkimin Evropian për mbështetjen e vazhdueshme që i ka dhënë KQZ dhe dhe nënvizuam se kjo mbështetje mund të forcohet më tej falë projekteve që po realizohen ndërkohë. KQZ-ja i ka zbatuar rekomandimet teknike, ndërsa ato me karakter politik kërkojnë vendimmarrjen e Qeverisë dhe të Kuvendit.

Në emër të KQZ, Celibashi deklaroi se zgjedhjet e ardhshme duhet të jenë më të mirat ndonjëherë si pasojë e afërsisë me anëtarësimin e plotë në BE. KQZ mban përgjegjësinë e vet, por zgjedhjet janë përgjegjësi edhe e të gjithë aktorëve të tjerë. KSHZ u dakordësua me Ambasadoren e BE në Tiranë se reforma zgjedhore patjetër duhet të adresojë:

🔹 keqpërdorimin e burimeve shtetërore;
🔹 veprimet e administratës publike gjatë fushatës zgjedhore;
🔹 financimin e fushatave zgjedhore;
🔹 profesionalizimin e administratës zgjedhore;
🔹 qytetarët që nuk kanë mundësi të votojnë.

KQZ do të vazhdojë bashkëpunimin e ngushtë me BE-në për procese zgjedhore sa më të besueshme dhe gjithëpërfshirëse.