Në kuadër të prezantimit të raportit vjetor të Prezencës së OSBE-së para Këshillit të Përhershëm dhe si i ftuar i posaçëm nga Kryesuesja e Organizatës për Siguri dhe Bashkëpunim në Europë (OSBE), Komisioneri Shtetëror i Zgjedhjeve, z. Ilirjan Celibashi mori pjesë në prezantimin dhe raportimin para përfaqësuesve nga 57 delegacionet e Këshillit të Përhershëm.

KSHZ falenderoi të pranishmit dhe veçanërisht Ambasadorin Michel Tarran dhe stafin e tij të Prezencës në Tiranë dhe deklaroi se jo vetëm KQZ Shqiperi, por i gjithë vendi ynë ruan respekt të thellë për OSBE-në.

“Partneriteti ynë me OSBE-në është themelor dhe i pazëvendësueshëm, duke sjellë rezultate konkrete në forcimin e administratës zgjedhore, nxitjen e dialogut dhe rritjen e besimit publik”- tha Celibashi.

Puna e Prezencës së OSBE-së ka qenë jetike, duke ofruar mbështetje teknike, trajnime dhe ekspertizë për Komisionin Qendror të Zgjedhjeve (KQZ), ndërkohë rekomandimet e ODIHR-it shërbejnë si një hartë rrugore praktike për forcimin e integritetit zgjedhor.

Përballë sfidave të reja zgjedhore, zhvillimet teknologjike dhe nevoja për përafrim me standardet evropiane, Komisioneri Celibashi bëri thirrje për mbështetje të vazhdueshme dhe të zgjeruar—veçanërisht për digjitalizimin e proceseve dhe lehtësimin e votimit për të gjithë zgjedhësit shqiptarë.

Investimi në zgjedhje është investim në stabilitetin demokratik dhe në të ardhmen evropiane të Shqipërisë!