Sot, Komisioneri Shtetëror i Zgjedhjeve shqyrtoi rezultatet e verifikimit të Prokurorit të Përgjithshëm për tre subjekte vetëdeklaruese:

1. Z. Desard Muzhaqi, kandidat për deputet i propozuar nga Partia “Koalicioni Euroatlantik”, Qarku Elbasan, për zgjedhjet e datës 11 maj 2025;
2. Z. Gramos Ismailaj, kandidat për deputet i propozuar nga Partia “Aleanca Demokracia e Re”, Qarku Vlorë, për zgjedhjet e datës 11 maj 2025;
3. Z. Kreshnik Gjonaj, kandidat për deputet i propozuar nga Partia “Socialdemokrate” Qarku Lezhë, për zgjedhjet e datës 11 maj 2025.

Në përfundim të shqyrtimit, KSHZ vendosi deklarimin e procedurës administrative të përfunduar dhe pa vendim përfundimtar për subjektet vetëdeklaruese z. Desard Muzhaqi, z. Gramos Ismailaj dhe z. Kreshnik Gjonaj, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve.

U plotësua edhe vakanca e krijuar në Këshillin e Bashkisë Krujë me kandidatin nga lista shumemërore e Partisë Agrare Ambjentaliste të Shqipërisë, z. Ramazan Ndreu.

Në seancën e sotme u shqyrtua kërkesa e komitetit përfaqësues të nismës ligjvënëse të zgjedhësve, për regjistrimin e nismës ligjvënëse të zgjedhësve “Për financimin shtetëror të trajtimeve shëndetësore të specializuara për fëmijët, brenda ose jashtë vendit, kur ato nuk ofrohen nga sistemi publik i kujdesit shëndetësor”.

Komiteti përfaqësues i nismës ligjvënëse të zgjedhësve i përbërë nga: z. Ardit Konomi, z. Ardit Baliko, z. Ardi Duro, zj. Çiljeta Simaku, zj. Ereandra Robo, z. Evis Miço, z. Ildi Theodhor, z. Klajdi Pllaha, z. Klevis Qafzezi, z. Koço Kërëku, zj. Ledia Bonja, z. Leonard Olli, zj. Manjola Arnautu, zj. Misenva Shtylla dhe z. Nertil Demiri, kanë paraqitur pranë KQZ, kërkesën për pajisje me fletë tip për mbledhjen e nënshkrimeve për propozimin e projektligjit “Për financimin shtetëror të trajtimeve shëndetësore të specializuara për fëmijët, brenda ose jashtë vendit, kur ato nuk ofrohen nga sistemi publik i kujdesit shëndetësor”. Pas vendimit të KSHZ për miratimin e fletës tip, Komiteti nismëtar ka depozituar fletët e mbledhjes së nënshkrimeve, të cilat u verifikuan nga Komisioni Qendror i Zgjedhjeve.

Sa më sipër, Komisioneri vendosi regjistrimin e nismës ligjvënëse të zgjedhësve “Për financimin shtetëror të trajtimeve shëndetësore të specializuara për fëmijët, brenda ose jashtë vendit, kur ato nuk ofrohen nga sistemi publik i kujdesit shëndetësor”

Gjithashtu, u shqyrtua administrativisht rezultati i verifikimit për subjektin vetëdeklarues, z. Kreshnik Riza Hajdari, Kryetar i Bashkisë Kuçovë, i propozuar nga subjekti zgjedhor “Partia Socialiste e Shqipërisë.

KSHZ konstatoi se z. Kreshnik Hajdari nuk përfshihet në kushtet e ndalimit të parashikuara nga ligji nr. 138/2015 dhe vendosi vijimin e ushtrimit të mandatit të tij si Kryetar i Bashkisë Kuçovë.

Shqyrtimi i raportit të gjetjeve nga auditimi i fondeve të përfituara dhe shpenzuara nga subjektet zgjedhore pjesëmarrëse në zgjedhjet për Kuvend, të datës 11 maj 2025 u shty për në seancën e radhës.