Sot, Komisioneri Shtetëror i Zgjedhjeve shqyrtoi raportin e gjetjeve nga auditimi i fondeve të përfituara dhe shpenzuara nga subjektet zgjedhore pjesëmarrëse në zgjedhjet për Kuvend, të datës 11 maj 2025.

KSHZ vendosi miratimin e gjetjeve të raportit të auditimit të fondeve të përfituara dhe të shpenzuara nga subjektet zgjedhore pjesëmarrëse në zgjedhjet për Kuvend, të datës 11 Maj 2025 dhe t’i propozojë Komisionit të Ankimimeve dhe Sanksioneve marrjen e masës administrative për 13 parti politike si më poshtë vijon:

1. Për mosdorëzim të raportit financiar brenda afatit ligjor, neni 173, pika 3, të Kodit Zgjedhor, marrja e masës administrative me gjobë ndaj:

a) “Partia Bashkimi Liberal Demokrat”, në masën 2.000.000 (dy milionë) lekë;

b) “Partia Rruga e Vërtetë Shqiptare”, në masën 2.000.000 (dy milionë) lekë;

c) “Partia Aleanca Arbnore Kombëtare”, në masën 2.000.000 (dy milionë) lekë;

1. Për dorëzim të raportit financiar jashtë afatit ligjor, neni 173, pika 3, të Kodit Zgjedhor, marrja e masës administrative me gjobë ndaj partive:

a) “Partia Aleanca Demokracia e Re”, në masën 500.000 (pesëqind mijë) lekë;

b) “Partia Aleanca Konservatore për Shqipërinë”, në masën 500.000 (pesëqind mijë) lekë;

c) “Partia Kristian Demokrate”, në masën 500.000 (pesëqind mijë) lekë.

1. Për shkelje të dispozitave ligjore që rregullojnë financimin e fushatës zgjedhore, neni 173, pika 1, të Kodit Zgjedhor, marrja e masës administrative me gjobë ndaj partive:

a) “Partia Balli Kombëtar”, në masën 100.000 (njëqind mijë) lekë;

b) “Partia Djathtas 1912”, në masën 100.000 (njëqind mijë) lekë;

c) “Partia Socialdemokrate”, në masën 100.000 (njëqind mijë) lekë;

d) “Partia Nisma Thurje”, në masën 100.000 (njëqind mijë) lekë;

e) “Partia Bashkimi për të Drejtat e Njeriut”, në masën 100.000 (njëqind mijë) lekë.

1. Për mosdorëzim të raporteve financiare të kandidatëve, neni 173, pika 3, të Kodit Zgjedhor, marrja e masës administrative me gjobë ndaj partive:

a) “Partia Lëvizja Atdheu”, në masën 500.000 (pesëqind mijë) lekë;

b) “Partia Aleanca Kombëtare Shqiptare”, në masën 500.000 (pesëqind mijë) lekë.

Gjithashtu në seancën e sotme publike Komisioneri Shtetëror i Zgjedhjeve miratoi procedurën e verifikimit të nënshkrimeve për referendumet dhe nismat ligjvënëse të zgjedhësve në Republikën e Shqipërisë.

Ky vendim përcakton procedurën administrative që ndiqet nga Komisioni Qendror i Zgjedhjeve për verifikimin e nënshkrimeve të zgjedhësve të paraqitura në mbështetje të nismave për zhvillimin e referendumeve dhe të nismave ligjvënëse të zgjedhësve.

Miratimi i këtij akti synon krijimin e një procedurë të qartë, të unifikuar dhe transparente për administrimin dhe verifikimin e nënshkrimeve, duke garantuar respektimin e parimeve të ligjshmërisë, paanshmërisë, proporcionalitetit, transparencës, mbrojtjes së të dhënave personale dhe të drejtës për një proces të rregullt administrativ.

Sot, u plotësua edhe vakanca në Këshillin e Bashkisë Peqin, me kandidatin nga lista shumemërore e “Partisë Socialiste të Shqipërisë”, z. Astrit Fadil Kaziu.