Sot, Komisioni i Ankimimeve dhe Sanksioneve në seancë publike shqyrtoi dy kërkesat ankimore nr. 2 dhe nr 3.

• Kërkesa ankimore nr. 2, depozituar nga subjekti zgjedhor Partia e Lirisë dhe z. Lefter Maliqi kishte si objekt “Ankim ndaj vendimit nr.46 datë 01.07.2026, të Komisionerit Shtetëror të Zgjedhjeve, “Për shqyrtimin administrativ të rezultatit të verifikimit për subjektin vetëdeklarues, z. Kreshnik Riza Hajdari, Kryetar i Bashkisë Kuçovë, i propozuar nga subjekti zgjedhor “Partia Socialiste e Shqipërisë”.
• Kërkesa ankimore nr. 3 e depozituar nga z. Lefter Maliqi, kishte si objekt: “1. Pranimin e ankimit si të bazuar në ligj dhe në prova. 2. Shfuqizimin e plotë të vendimit nr. 46, datë 01.07.2026, të KSHZ. 3. Ndryshimin e vendimit dhe konstatimin se z. Hajdari ka paraqitur të dhëna të pavërteta, të paplota dhe të pasakta në formularin e vetëdeklarimit të depozituar në 02.04.2023, duke mos deklaruar dënimin penal dhe masën e dëbimit nga Republika e Greqisë. 4. Konstatimin se deklarimi i rremë në formularin e dekriminalizimit sjell sipas ligjit nr. 138/2015 dhe Vendimit të Kuvendit nr. 17/2016, përjashtimin e menjëhershëm dhe në çdo kohë nga kandidimi, zgjedhja dhe ushtrimi i funksionit publik. 5. Shpalljen e pavlefshmërisë dhe përfundimin e parakohshëm të mandatit të kryetarit të bashkisë Kuçovë z. Hajdari, si dhe njoftimin e menjëhershëm të Kryeministrit dhe institucioneve kompetente për vijimin e procedurave ligjore. 6. Në mënyrë alternative, shfuqizimin e vendimit nr. 46/2026 dhe kthimin e çështjes për rishqyrtim nga KSHZ, me detyra të qarta dhe të detyrueshme për shqyrtimin e pasojave të deklarimit të rremë, të vendimit penal për falsifikimin e formularit të precedentit Agim Kajmaku dhe të gjëndjes juridike në momentin e kandidimit”.

Në përfundim të shqyrtimin, me shumicë votash KAS vendosi rrëzimin e të dy kërkesave ankimore dhe lënien në fuqi të vendimit nr. 46, datë 01.07.2026, të Komisionerit Shtetëror të Zgjedhjeve.