Rreth 114 mijë të rinj fitojnë të drejtën për të votuar për herë të parë në zgjedhjet e 11 majit. Për t’i informuar dhe ndërgjegjësuar ata për rëndësinë e ushtrimit të kësaj të drejte, po zhvillohet gjatë muajit prill një program edukimi në të gjitha shkollat e mesme publike në vend. Komisioneri Shtetëror i Zgjedhjeve, z. Ilirjan Celibashi ndoqi sot nga afër ushtrimin e votimit të maturantëve të shkollës së mesme “Qemal Stafa” në Tiranë, në kuadër të këtij programi edukues. Pjesë e eventit ishte dhe ambasadori i Gjermanisë në Shqipëri, z. Karl Bergner, drejtuesja e Zyrës së Këshillit të Evropës në Tiranë, znj. Giulia Re si dhe drejtori i Akademisë së Studimeve Politike, z. Erjon Tase.

Z. Celibashi theksoi ne fjalën e tij rëndësinë e edukimit të maturantëve që votojnë për herë të parë në këto zgjedhje. “Shpresoj që ju do t’i transmetoni këto njohuri që keni përfituar gjatë programit edhe të familjarët dhe shokët tuaj jashtë shkollës. Do t’ju ftoja edhe njëherë që të ushtroni këtë të drejtë dhe mundësi që ju është ofruar për të vendosur për të ardhmen tuaj”, u shpreh komisioneri. Ai falenderoi gjithashtu Këshillin e Evropës dhe ambasadën gjermane si dhe partnerët vendas, të cilët mundësuan zbatimin e këtij programi të vlefshëm.

Ambasadori i Gjermanisë, z. Karl Bergner, ftoi të rinjtë të ushtrojnë të drejtën që fitojnë këtë 11 maj. “Vota e juaj, vota e të rinjve, është edhe më e rëndësishme sepse ju do të vendosni për të ardhmen tuaj por edhe zhvillimin e vendit. Ju inkurajoj që ta shfrytëzoni këtë të drejtë dhe përgjegjësi që keni fituar”.

Drejtuesja e zyrës së Këshillit të Evropës në Tiranë, znj. Giulia Re, nënvizoi se zgjedhjet janë një “gur themeli” i demokracisë. “Sot po praktikoni çfarë do të thotë të jesh një pjesëmarrës aktiv dhe i informuar në një demokraci funksionale. Vota juaj sot, edhe pse është një ushtrim i simuluar, përfaqëson formën e demokracisë që duam të shohim të gjithë”, u shpreh znj. Re.

Drejtori i Akademisë së Studimeve Politike, zbatuese e këtij programi, z. Erjon Tase, shprehu vlerësimin për bashkëpunimin e kënaqshëm me KQZ dhe Agjencisë Kombëtare të Arsimit Parauniversitar (AKAP), për të mundësuar zbatimin me sukses të fushatës edukuese edhe në shkollat më të largëta, aty ku nevoje për edukim është edhe më e madhe.

Më pas të ftuarit ndoqën nxënësit votues për herë të parë, të cilët organizuan një proces të simuluar votimi në klasën e tyre për tre kandidatë dhe morën role përkatëse si komisionerë, vëzhgues, media etj. Nëpërmjet këtij ushtrimi synohet praktikimi i tyre me procedurën e votimit duke evituar parregullsitë e mundshme në ditën e zgjedhjeve. Pas zgjedhjeve projekti do të vijojë monitorimn e pjesëmarrjes së votuesve të rinj si dhe aktivitetin e tij për integrimin e edukimit zgjedhor në kurrikulat e edukimit qytetar në arsimin parauniversitar.

Ky aktivitet u zhvillua si pjesë e programit “Edukimi i votuesve për herë të parë në Shqipëri 2025 – Unë votoj gjithashtu!”, si një bashkëpunim mes Komisionit Qendror të Zgjedhjeve, Agjencisë Kombëtare të Arsimit Parauniversitar (AKAP) dhe Akademisë së Studimeve Politike (ASP), si pjesë e projektit të Këshillit të Evropës “Fuqizimi i Integritetit të Zgjedhjeve në Shqipëri" (SEI) me mbështetjen financiare të Republikës Federale të Gjermanisë.

Informacion i mëtejshëm

Edukimi i votuesve për herë të parë në Shqipëri 2025 - Unë votoj gjithashtu !

Projekti synon të kontribuojë në nxitjen e angazhimit qytetar, rritjen e ndërgjegjësimit për zgjedhjet dhe përgatitjen e nxënësve dhe të rinjve për pjesëmarrje aktive gjatë procesit zgjedhor.

Gjatë dy muajve të fundit, programi ka trajnuar mbi 365 mësues në të gjitha shkollat e mesme të vendit mbi kurrikulën e Këshillit të Evropës mbi edukimin zgjedhor për nxënësit e moshës 17-18 vjeç, tashmë e akredituar nga Agjencia për Sigurimin e Cilësisë së Arsimit ParaUniversitar (ASCAP).

Këta mësues, kanë zhvilluar në muajin prill dy orë informuese mësimi mbi demokracinë, sistemet zgjedhore dhe rëndësinë e votës me rreth 20 mijë maturantë, pjesë e të rinjve që votojnë për herë të pare në këto zgjedhje.

Programi po finalizohet në këto ditë përpara zgjedhjeve me ushtrimin e votimit, një proces simulimi i qendrës së votimit ku maturantët marrin role përkatëse si komisionerë, vëzhgues, gazetarë, dhe gjithashtu votojnë për 2-3 kandidatët e zgjedhur nga klasa apo shkolla e tyre. Nëpërmjet këtij ushtrimi, synohet praktimi i votuesve të rinj me procesin, por edhe informimi i tyre mbi problemet e votimit familjar apo shit-blerjes së votës, të cilat dëmtojnë standartet zgjedhore. Nxënësit nxiten gjithashtu që të transmetojnë këto mesazhe ndërgjegjësimi edhe tek familjarët e tyre.

Ky program është ndërtuar mbi eksperiencën pozitive të fituar nga fushatat e mëparshme të zbatuara që prej vitit 2011 në vigjilje të zgjedhjeve.