Komisioneri Shtetëror i Zgjedhjeve shqyrtoi administrativisht kërkesën nga subjekti zgjedhor Koalicioni “Partia Demokratike-Aleanca për Shqipërinë Madhështore”, për ndërprerjen e menjëhershme të transmetimit të spotit/reklamës të subjektit zgjedhor “Partia Socialiste e Shqipërisë”. Pas dëgjimit të pretendimeve të palëve, shqyrtimi do të vijojë në seancën e radhës pas administrimit të provave.

Në seancën e sotme KSHZ shqyrtoi 21 raportet e shkeljeve të depozituara nga monitoruesit e fushatës zgjedhore për periudhën 24-28 Prill 2025.

Subjekti zgjedhor Koalicioni “Partia Demokratike-Aleanca për Shqipërinë Madhështore” në kundërshtim me udhëzimin nr. 6, datë 23.3.2021, të KSHZ, ka hapur zyra zgjedhore në bashkitë Dibër, Fier, Kamëz, Këlcyrë, Korçë, Përmet, Pukë dhe Tiranë.

Subjekti i zgjedhor “Partia Mundësia” në kundërshtim me nenin 5, pika 1 e udhëzimit nr. 6, datë 23.3.2021 të KSHZ, ka hapur zyra zgjedhore në bashkitë Kukës dhe Gjirokastër.

Subjekti zgjedhor “Koalicioni Euroatlantik” në kundërshtim me nenin 5, pika 1 e udhëzimit nr. 6, datë 23.3.2021 të KSHZ, ka hapur zyra zgjedhore në bashkitë Gjirokastër, Kamëz dhe Tiranë.

Subjekti zgjedhor “Partia Socialdemokrate e Shqipërisë”, në kundërshtim me nenin 5, pika 1 e udhëzimit nr. 6, datë 23.3.2021 të KSHZ, ka hapur zyra zgjedhore në bashkitë Tiranë dhe Kamëz.

Komisioneri u la afat subjekteve 24 orë për mbylljen e zyrave zgjedhore, ndërkohë subjekteve zgjedhore “Partia Mundësia dhe “Koalicioni Euroatlantik” u la kohë të depozitojnë prova/dokumente të cilat vertetojnë që janë selitë e degëve të partive të tyre dhe jo zyra zgjedhore.

U shqyrtua denoncimi nr. 137 ID, datë 28.4.2025, ku në Bashkinë Durrës, njësia administrative Fllakë, janë identifikuar materiale propagandistike të subjektit zgjedhor Koalicioni “Partia Demokratike – Aleanca për Shqipërinë Madhështore”, të afishuara në shtyllat elektrike, në kundërshtim të nenit 3, pika 2 e udhëzimit nr. 6, datë 23.3.2021, të KSHZ. U kërkua heqja e materialeve propagandistike nga shtyllat elektrike të lartëpërmendura.

Gjithashtu, u shqyrtua raporti i Autoritetit të Medias Audiovizive të pasqyrimit të fushatës zgjedhore nga OSHMA-të, për periudhën 17 prill-23 prill 2025”. AMA konstaton se 2 OSHMA-të Bulevard Tv dhe 6+1 TV, kanë transmetuar reklama jashtë fashave orare të lejuara ndërsa Shijak TV, në emisionet mbi procesin zgjedhor ka aplikuar ndarjen e ekranit gjatë transmetimit dhe në një prej ndarjeve ka vendosur në mënyrë të pandërprerë postera të kandidatëve për deputet.

Komisioneri kërkoi të administrohen pretendimet e Ofruesve të Shërbimit Mediatik Audioviziv, për të vijuar me vendimmarrjen në seancën e radhës.