Komisioni Qendror i Zgjedhjeve zhvilloi testin operacional të pajisjeve të votimit dhe numërimit elektronik, projektit pilot i cili për zgjedhjet e datës 11 Maj do të zbatohet vetëm në Njësinë Administrative nr. 10 në Tiranë dhe në Bashkinë Vorë.

Në zbatim të nenit 22 pika 6 të Kodit Zgjedhor, KQZ përdori 3% të pajisjeve PEVN për të simuluar procesin e hapjes, mbylljes dhe transmetimit të votimit. Testimi operacional evidenton përputhshmërinë e kritereve të përcaktuara nga KQZ në raport me atë çfarë ofrojnë pajisjet.

Komisioneri Shtetëror i Zgjedhjeve, z. Ilirjan Celibashi garantoi zgjedhësit se ekziston e gjithë garancia dhe siguria e votës së tyre.

“Pajisjet garantojnë 100 % fshehtësinë e votës së zgjedhesve. Nuk ka asnjë lloj mundësie, as kompania që ka prodhuar pajisjet, as KQZ dhe askush nuk mund të identifikojë dhe zbulojë votën e qytetarëve. Pajisjet ofrojnë garancitë e plota të fshehtësisë së votes”.

Pajisja Elektronike e Votimit dhe Numërimit lejon votimin në mënyrë të thjeshtë dhe të sigurt për qytetarët.

Vota elektronike shoqërohet me votën e printuar, e cila verifikohet nga vetë zgjedhësi para se ajo të bjerë në kutinë e votimit. Software i pajisjes ofron standarde të larta sigurie dhe ndërfaqja e votimit është e ngjashme me fletën e printuar të votimit. Në këtë mënyrë votuesi e do ta ketë të lehtë të ndërveprimin me pajisjen.

Me qëllim që qytetarët të familjarizohen me përdorimin e këtyre pajisjeve, ka vendosur Qendat e Informimit pranë zonave ku do të implementohet votimi dhe numërimi elektronik, qytetarët mund të përdorin pajisjet dhe të simulojnë procesin e votimit.

Në zgjedhjet e datës 11 Maj 2025, Pajisja Elektronike e Votimit dhe Numërimit, do të përdoret vetëm në 44 qendrat e votimit në Bashkinë Vorë dhe 31 qendrat e votimit në Njësinë Administrative nr. 10, Tiranë.

Testimi u krye në prezencë të vëzhguesve ndërkombëtarë, të shoqërisë civile dhe medias.