Sot, Komisioni Rregullator zhvillon miratoi disa ndryshime në vendimin nr. 20, datë 20.4.2023, të Komisionit Rregullator, “Për miratimin e udhëzuesve për mënyrën e raportimit financiar gjatë fushatës zgjedhore për zgjedhjet për Organet e Qeverisjes Vendore”.

Rregullatori miratoi ndryshime në 3 udhëzuesit:

1-Udhëzues për raportimin e partisë politike;

2-Udhëzues për mënyrën e raportimit financiar të kandidatëve të listave shumemërore;

3-Udhëzues për mënyrën e raportimit financiar të kandidatëve për kryetar bashkie.

Ky vendim erdhi si nevojë për të reflektuar ndryshimet e fundit të Kodit Zgjedhor.

Partitë politike/subjektet zgjedhore, të cilat marrin pjesë në zgjedhje, kandidatët dhe mbështetësit e tyre janë të detyruar të zbatojnë rregullat për financimin e fushatës zgjedhore. Ndaj, këta udhëzues synojnë të shpjegojnë aspektet kryesore të kuadrit ligjor dhe në veçanti të ndihmojnë partitë politike, kandidatët e listave shumemërore, si dhe kandidatët e propozuar nga zgjedhësit që garojnë në zgjedhje për organet e qeverisjes vendore, për mënyrën e plotësimit të raporteve financiare të fushatës zgjedhore, sipas përcaktimeve ligjore në fuqi.

Gjithashtu, përfshihen përkufizime dhe shembuj konkretë të raportimit të financave në formatet standarde të miratuara në përputhje me kuadrin ligjor. Ndërkohë shpjegohet edhe regjistrimi i veprimeve financiare në formatet e standardizuara dhe mënyra e duhur e raportimit të tyre.

Risi në këtë vendim janë:

- Mënyra e përllogaritjes së shpenzimeve. Konkretisht, përcaktohet se shpenzimet e kryera nga kandidatët nuk do të përfshihen në totalin e shpenzimeve të partisë politike. Ndërkohë, shpenzimet e partisë politike mbeten të kufizuara dhe nuk mund të tejkalojnë pesëfishin e shumës më të madhe të përfituar nga një subjekt zgjedhor nga fondet publike për fushatën zgjedhore.

- Përfshirja e vetëfinancimit të kandidatëve të listave shumemërore të partisë politike ose koalicionit zgjedhor të regjistruar si subjekte zgjedhore deri në shumën 3 milion lekë, sipas nenit 92/2, pika 3/1, e Kodit Zgjedhor, i ndryshuar.