Komisioni Qendror i Zgjedhjeve të Shqipërisë dhe KQZ-të e Republikës së Moldavisë, Ukrainës dhe Maqedonisë së Veriut nënshkruan një Memorandum Mirëkuptimi për forcimin e qëndrueshmërisë demokratike dhe bashkëpunimit evropian.

Ceremonia e nënshkrimit u zhvillua gjatë sesionit përmbyllës të Konferencës Rajonale “Paratë në Politikë 2026” dhe shënoi një moment të rëndësishëm për forcimin e bashkëpunimit rajonal në fushën zgjedhore.

Dokumenti pasqyron angazhimin e përbashkët të institucioneve zgjedhore nënshkruese për promovimin e zgjedhjeve të lira dhe të ndershme, forcimin e integritetit zgjedhor dhe zhvillimin e demokracive të qëndrueshme.

Memorandumi rikonfirmon gjithashtu angazhimin e shteteve nënshkruese ndaj rrugëtimit evropian dhe bashkëpunimit në procesin e harmonizimit të legjislacionit dhe praktikave kombëtare me standardet dhe vlerat e Bashkimit Evropian, përfshirë edhe në kuadër të përpjekjeve të përbashkëta për mbrojtjen e demokracisë dhe luftën kundër kërcënimeve hibride. Dokumenti bazohet në objektivin e përbashkët të katër shteteve për anëtarësim në Bashkimin Evropian dhe krijon një kuadër bashkëpunimi të dedikuar për forcimin e kapaciteteve institucionale të autoriteteve zgjedhore përballë sfidave aktuale me të cilat përballen proceset demokratike.

Bashkëpunimi ndërmjet institucioneve nënshkruese do të fokusohet në fusha të tilla si transparenca e financimit politik dhe zgjedhor, lufta kundër korrupsionit zgjedhor, parandalimi dhe kundërshtimi i dezinformimit dhe ndërhyrjeve të huaja informative, siguria kibernetike, digjitalizimi i proceseve zgjedhore, shkëmbimi i praktikave më të mira dhe zhvillimi i kapaciteteve profesionale të personelit zgjedhor.

Me nënshkrimin e këtij Memorandumi, autoritetet zgjedhore të Republikës së Shqipërisë, Republikës së Maqedonisë së Veriut, Republikës së Moldavisë dhe Ukrainës përcjellin një mesazh të përbashkët solidariteti institucional dhe angazhimi për forcimin e integritetit zgjedhor dhe qëndrueshmërisë demokratike. Njëkohësisht, Memorandumi mbetet i hapur për aderimin e autoriteteve të tjera zgjedhore që ndajnë të njëjtat vlera, parime dhe objektiva për mbrojtjen e demokracisë, forcimin e institucioneve zgjedhore dhe promovimin e standardeve evropiane.

Nënshkrimi i Memorandumit përbën një nga rezultatet kryesore të Konferencës Rajonale “Paratë në Politikë”, e cila mblodhi në Kishinau, më 16 dhe 17 qershor 2026, përfaqësues të autoriteteve zgjedhore, institucioneve të mbikëqyrjes dhe zbatimit të ligjit, organizatave ndërkombëtare dhe shoqërisë civile nga më shumë se 20 shtete.