KQZ dhe ASPA drejt forcimit të kapaciteteve të administratës publike për proceset zgjedhore

Komisioneri Shtetëror i Zgjedhjeve, z. Ilirjan Celibashi, zhvilloi një takim me Drejtoren e Përgjithshme të ASPA-s, znj. Emona Boçe, për të diskutuar mundësitë e bashkëpunimit në edukimin, ndërgjegjësimin dhe trajnimin e administratës publike qendrore dhe vendore mbi detyrimet që lidhen me proceset zgjedhore.

Në fokus të diskutimeve ishte forcimi i masave parandaluese ndaj keqpërdorimit të burimeve shtetërore dhe aseteve publike për qëllime elektorale, një problematikë e evidentuar vazhdimisht nga misionet vëzhguese të OSBE/ODIHR. Palët ndanë qëndrimin se informimi dhe trajnimi i hershëm i nëpunësve publikë përbën një instrument të rëndësishëm për garantimin e integritetit të proceseve zgjedhore.

Gjithashtu, u diskutua organizimi i sesioneve informuese dhe programeve trajnuese për institucionet publike, me fokus respektimin e detyrimeve ligjore gjatë periudhave zgjedhore, përfshirë raportimin e veprimtarive me karakter publik.

ASPA shprehu gatishmërinë për të mbështetur këtë nismë përmes kapaciteteve dhe platformave të saj trajnuese, ndërsa të dy institucionet ranë dakord të vijojnë punën për hartimin e një marrëveshjeje bashkëpunimi që do të krijojë një qasje të qëndrueshme dhe afatgjatë për ngritjen e kapaciteteve të administratës publike në çështjet zgjedhore.

Edukimi, ndërgjegjësimi dhe parandalimi mbeten elementë kyç për forcimin e standardeve të integritetit dhe profesionalizmit në administratën publike gjatë proceseve zgjedhore.