Komisioni Qendror i Zgjedhjeve përmbylli seminarin dyditor për Planin Strategjik dhe Strategjinë e Edukimit 2027–2031, duke shënuar kalimin nga hartimi dhe validimi i dokumenteve strategjike në planifikimin konkret të zbatimit të tyre.

Në hapje të punimeve, Komisioneri Shtetëror i Zgjedhjeve, z. Ilirjan Celibashi, theksoi rëndësinë e përkthimit të strategjive në veprime konkrete institucionale: “Strategjitë janë tonat, dhe tani duhet t’i kthejmë në punë të përditshme”. Përfaqësuesit e Këshillit të Evropës, znj. Liri Kopaci-Di-Michele dhe z. Franck Daeschler, vlerësuan angazhimin e KQZ-së për një planifikim të qartë, të matshëm dhe të orientuar drejt zbatimit.

Gjatë seminarit, drejtoritë e përgjithshme të KQZ-së shqyrtuan objektivat dhe veprimet strategjike, identifikuan boshllëqet dhe mbivendosjet dhe përcaktuan përgjegjësitë institucionale për zbatimin e tyre, me orientimin e ekspertëve të Këshillit të Evropës.

Në vijim, veprimet strategjike u përkthyen në aktivitete konkrete për vitin 2027, secili i përcaktuar me përgjegjës, afat, burime dhe tregues matës. Gjithashtu, u identifikuan aktivitetet që kërkojnë bashkëpunim ndërmjet strukturave dhe u diskutuan mekanizmat për ndjekjen e zbatimit të planit dhe ndërhyrjen në kohë nga drejtimi i institucionit.

Kështu, KQZ ka tashmë bazën e planit të punës për vitin 2027, ndërsa dy dokumentet strategjike u përmbyllën dhe u miratuan zyrtarisht në përfundim të seminarit.

Fjalët përmbyllëse të aktivitetit u mbajtën nga Komisioneri Shtetëror i Zgjedhjeve, z. Ilirjan Celibashi, dhe Drejtuesja e Divizionit të Bashkëpunimit Parlamentar dhe Zgjedhor të Këshillit të Evropës, znj. Liri Kopaci-Di-Michele.

Aktiviteti u zhvillua në kuadër të projektit “Forcimi i integritetit të zgjedhjeve në Shqipëri” (SEI) të Këshillit të Evropës, me mbështetjen e Ambasadës Gjermane në Tiranë.