Komisioneri Shtetëror i Zgjedhjeve, z. Ilirjan Celibashi bashkëbisedoi me përfaqësues të medias mbi ecurinë e përgatitjeve të procesit të zgjedhjeve për Kuvend, të datës 11 Maj 2025.

Informacionet e përcjella:

Baza materiale zgjedhore

KQZ ka nisur shpërndarjen e materialeve zgjedhore në Komisionet e Zonave të Administrimit Zgjedhor (KZAZ). Ka përfunduar shpërndarja për qarqet:

1. Gjirokastër
2. Dibër
3. Shkodër
4. Lezhë
5. Vlorë
6. Korçë
7. Berat
8. Kukës

Janë në proces qarqet:

1. Fier
2. Elbasan
3. Tiranë
4. Durrës

Identifikimi elektronik

KQZ është në përfundim të procesit të përgatitjes së të gjitha pajisjeve elektronike të identifikimit (PEI) që do të përdoren për identifikimin elektronik të zgjedhësve ditën e votimit.

Në fundin e kësaj jave fillon shpërndarja e PEI, pasi bëhet veçmas nga pjesa tjetër e materialeve zgjedhore.

Krimet zgjedhore

Një ditë më parë është organizuar një takim me Prokurorin e Përgjithshëm, Drejtuesin e SPAK dhe Drejtorin e Policisë së Shtetit për të diskutuar nga pikëpamja institucionale mbi atë çfarë duhet të bëjë çdo institucion për mbarëvajtjen e procesit zgjedhor dhe ditën e zgjedhjeve. Shkëmbyem informacione në lidhje ecurinë e deritanishme mbi parregullsitë e evidentuara të karakterit administrativ dhe penal dhe për masat që secili institucion duhet të ndërmarrë për t’u përgjigjur çdo rasti të mundshëm, deri në ditën e zgjedhjeve, ditën e zgjedhjeve përfshirë dhe procesin e numërimit dhe vlerësimit të fletëve të votimit.

Sipas informacioneve të përcjella nga SPAK, deri tani janë 115 materiale kallëzuese nga subjektet zgjedhore/referime nga policia shtetit/ të iniciuara kryesisht/ të denoncuara në platformën online të SPAK/të denoncuara nga qytetarët. Nga të cilat:

• 25 nga subjektet zgjedhore
• 35 nga platforma online
• 35 procedime penale nga të cilat 8 janë iniciuar kryesisht nga SPAK.

Sipas të dhënave të Prokurorisë së Përgjithshme, janë regjistruar 32 kallzime penale për vepra penale. Kallzimet janë regjistruar 3 në Prokuroritë Tiranë, 4 në Prokurorinë Elbasan, 3 në Prokurorinë Sarandë, 2 në Prokurorinë Durrës, 3 në Prokurorinë Kukës, 2 në Prokurorinë Gjirokastër, 5 në Prokurorinë Fier, 1 në Prokurorinë Korçë, 5 në Prokurorinë Dibër, 2 në Prokurorinë Vlorë dhe 2 në Prokurorinë Shkodër.

Nga numri i përgjithshëm i kallëzimeve penale, për 7 prej tyre është vendosur mosfillimi i hetimeve, një kallëzim ka kaluar për kompetencë në SPAK, 17 janë regjistruar procedime penale dhe pjesa tjetër është në fazë verifikimi.

Votimi nga jashtë

Shifrat janë publike tashmë:

• 245,935 Zarfe të dërguara
• 224,628 Zarfe të marra nga Zgjedhësit
• 144,783 Zarfe të mbërritura në KQZ

Nga 21 mijë zarfe të cilat nuk janë shpërndarë ende, rreth 11 mijë nuk janë shpërndarë për shkak të pasaktësisë në adresë, në email apo numër të kontaktit dhe DHL nuk ka mundur t’i kontaktojë. Ndaj u është bërë thirrje zgjedhësve të interesohen pranë zyrave të DHL për të marrë zarfin e tyre.

Pjesa tjetër nuk i është përgjigjur DHL dhe ndaj janë akoma në zyrën e ofruesit të shërbimit postar deri në datën 8 maj 2025.

Sa i përket shqetësimeve të ngritura për shpërndarjen e zarfeve, Komisioneri u shpreh se marrëdhënia kontraktuale me ofruesin e shërbimit postar do të bëhet në përfundim të afatit të kontratës. Vlerësimi i përmbushjes së detyrimeve kontraktuale do të bëhet në përfundim të procesit, siç ndodh me çdo marrëdhënie kontraktuale.

“Vlen të theksojmë së kemi shënuar çdo gjë që vlen të shënohet sa i përket këtij procesi dhe që duhet të diskutohet. Kemi ndjekur dhe marrë në konsideratë të gjithë shqetësimet e ngritura pranë KQZ” – tha ai.

Ka vetëm një mënyrë për të adresuar problematikën që has çdo zgjedhës në këtë proces, pasi problematikat janë individuale. Çdo zgjedhës duhet të futet në llogarinë e tyre në PER dhe të raportojë problematikën.

Deri tani në PER ka patur156 raportime, nga të cilat:

• 90 raportime zarfi është lënë në hyrje të banesës ose kutinë postare
• 21 raportime që DHL nuk pranon të marrë zarfin mbrapsht
• 9 raportime që në dokumentacionin zgjedhor nuk ju ka mbërritur fleta votimit (8 prej të cilëve ua kemi dërguar fletën e votimit)
• 4 raportime që nuk kanë marrë njoftim nga DHL
• 3 raportime që nuk e kanë marrë akoma zarfin
• 29 të tjera kanë raportuar problematika të ndryshme.

Këto janë ankesat zyrtare në KQZ, por kemi adresuar çdo shqetësim që ka mbërritur në rrugë të ndryshme komunikimi.

Interesit të gazetarëve mbi integritetin e procesit të votimit nga jashtë, KSHZ u shpreh se në mënyrë kategorike nuk vihet në diskutim integriteti i procesit të votimit nga jashtë. Është një proces i cili nuk është realizuar idealisht, por është një proces i realizuar shumë mirë dhe këtë e tregojnë numrat. Gjithsesi shtoi ai, çdokush mund të ketë gjykimin e tij, por kurrsesi nuk vihet në diskutim integriteti i procesit.

‘Vlerësoj mendimin e çdokujt dhe e vlerësoj faktin që kanë kontribuar të gjithë në këtë proces, që nga partitë politike deri te organizatat e shoqërisë civile.

Ky proces do të duhet të vlerësohet ashtu siç është duke u zhvilluar. Po bëhet për herë të parë, natyrisht ka probleme, por gjithë secili prej jush apo dikush tjetër mund të konsultojë se si qëndrojmë në raport me eksperiencat e vendeve të tjera (është më e keqe, më e mirë apo normale)’ - theksoi Komisioneri Celibashi

KSHZ theksoi se është me shumë rëndësi që çdo zgjedhës nga jashtë të raportojë problematikën që has në Platformën Elektronike të regjistrimit (PER) dhe të kontaktojë DHL për të marrë zarfin e tyre.