Sot, Komisioneri Shtetëror i Zgjedhjeve shqyrtoi kërkesën për pajisjen me fletë tip për mbledhjen e nënshkrimeve për nismën ligjvënëse të zgjedhësve në Republikën e Shqipërisë, për propozimin e projektligjit “Për financimin shtetëror të trajtimeve shëndetësore të specializuara për fëmijët, brenda ose jashtë vendit, kur ato nuk ofrohen nga sistemi publik i kujdesit shëndetësor”.

Kërkesa u bë nga Komiteti Nismëtar; z. Ardit Konomi, z. Ardit Baliko, z. Ardi Duro, zj. Çiljeta Simaku, zj. Ereandra Robo, z. Ervis, Miço, z. Ildi Theodhor, z. Klajdi Pllaha, z. Klevis Qafzezi, z. Koço Kërëku, zj. Ledia Bonja, z. Leonard Olli, zj. Manjola Arnautu, zj. Misenva Shtylla dhe z, Nertil Demiraj. Projektligji që do t’i propozohet Kuvendit të Republikës së Shqipërisë, sipas kërkesës së komitetit përfaqësues, ka për qëllim të garantojë në mënyrë të qartë, të detyrueshme dhe të strukturuar financimin nga shteti të trajtimeve shëndetësore të specializuara për fëmijët 0-18 vjeç, në rastet kur këto trajtime nuk ofrohen nga sistemi publik i kujdesit shëndetësor në Republikën e Shqipërisë.

KSHZ vendos miratimin e fletës tip për mbledhjen e nënshkrimeve. Procedura për mbledhjen e nënshkrimeve të zgjedhësve të realizohet brenda 3 (tre) muajve nga hyrja në fuqi e këtij vendimi.