Në datat 11–12 Dhjetor 2025 u zhvilluan punimet e tryezës dyditore të dedikuar analizës së përgatitjes së proceseve zgjedhore për vitin 2025. Ky aktivitet përbën një moment të rëndësishëm për KQZ, pasi krijon mundësinë për reflektim, analizë dhe diskutime në mënyrë gjithëpërfshirëse mbi sfidat dhe prioritetet që lidhen me administrimin zgjedhor.

Në hapje të aktivitetit, Komisioneri Shtetëror i Zgjedhjeve, z. Ilirjan Celibashi përshëndeti pjesëmarrësit së bashku me Ambasadorin Michel Tarran të Prezencës së OSBE-së në Shqipëri, duke nënvizuar rëndësinë e bashkëpunimit të ngushtë institucional dhe angazhimin tonë të përbashkët për forcimin e integritetit zgjedhor.

Në këtë tryezë morën pjesë si Komision Qendror i Zgjedhjeve, së bashku me Komisionin Rregullator dhe Komisionin për Ankimimet dhe Sanksionet, duke sjellë perspektiva të ndryshme dhe komplementare për funksionimin e proceseve zgjedhore.

Gjithashtu, diskutimet u zhvilluan në bashkëpunim të ngushtë me organizatat e shoqërisë civile të angazhuara në fushën e zgjedhjeve, si edhe me përfaqësues të medias, të cilët luajnë një rol thelbësor në transparencën dhe informimin e publikut.

Gjatë dy ditëve të tryezës, u trajtojtuan tema kyçe, përfshirë:

• Menaxhimin e votimit nga jashtë dhe mësimet e nxjerra nga procesi
• Trajnimin dhe kapacitetet e administratës zgjedhore
• Edukimin zgjedhor dhe komunikimin me publikun
• Raportimin e institucioneve dhe administrimin e ankesave gjatë fushatës
• Regjistrimin e subjekteve zgjedhore dhe verifikimin e pastërtisë së figurës
• Monitorimin e medias dhe financimit të fushatës zgjedhore

Zbatimin e teknologjisë në identifikim, votim dhe numërim elektronik

KQZ beson se shkëmbimi i lirë i ideve, i mbështetur nga ekspertiza e brendshme dhe ajo e partnerëve tanë kombëtarë e ndërkombëtarë, do të ndikojë drejtpërdrejt në rritjen e cilësisë dhe transparencës së proceseve zgjedhore.