Komisioneri Shtetëror i Zgjedhjeve, z. Ilirjan Celibashi bisedoi sot me përfaqësuesit e Meta (Facebook), znj. Kateryna Kruk, Drejtore Rajonale për Politikat Publike të Evropës Qendrore e Lindore dhe z. Oskar Braszczyński, Menaxher Partner për Qeverinë, Politikën dhe Organizatat Jofitimprurëse.

Fokusi i takimit ishte eksplorimi i mënyrave të bashkëpunimit dhe hapja e kanaleve të komunikimit të drejtpërdrejtë të Komisionit Qendror të Zgjedhjeve me grupin më të madh të mediave sociale në botë, kjo në funksion të përpjekjeve për të ofruar transparencë për partitë politike shqiptare në mediat sociale dhe shpenzimet online.

Oskar Braszczyński prezantoi punën e Meta për transparencën e reklamave politike dhe adresoi pyetjet dhe kërkesat tona. KQZ-së iu ofrua pasqyra e plotë dhe një sërë mjetesh të nevojshme për të zbatuar më mirë kërkimin e transparencës së plotë në reklamat politike shqiptare, veçanërisht gjatë periudhave kohore elektorale.

Komisioneri Shtetëror i Zgjedhjeve, mirëpriti mundësinë për të përfituar nga programi i transparencës së reklamave politike të platformave Meta dhe pohoi se ky është një hap i rëndësishëm përpara në përballjen e sfidës së KQZ për t’i dhënë dritë të plotë shpenzimeve reale online të ekosistemit të partive politike shqiptare.