Komisioni Qendror i Zgjedhjeve në bashkëpunim me Institutin Ndërkombëtar për Demokraci dhe Asistencë Zgjedhore (International IDEA) dhe Qendrën për Sundimin e Ligjit të Finlandës (University of Helsinki) organizuan një seminar tre-ditor mbi sigurinë kibernetike dhe dizinformimin në zgjedhje.
Trajnimi u zhvillua sipas modulit të BRIDGE dhe pjesë e tij ishin punonjës të KQZ-së, përfaqësues së medias, të shoqërisë civile dhe përfaqësues të AKCESK.
Seminari ofroi konceptet themelore, parimet, implikimet dhe ndikimin e sigurisë kibernetike dhe dizinformimit në integritetin e zgjedhjeve dhe të rezultateve.
Gjithashtu, shërbeu për eksplorimin e një sërë kërcënimesh të sigurisë kibernetike dhe vlerat që mbështesin një zgjedhje të mirë në administrimin e këtyre kërcënimeve dhe ndikimin në shpërndarjen e ngjarjeve/informacioneve që ndikojnë në procesin zgjedhor.
Ky seminar shërbeu edhe për certifikimin e dy trajnereve të para në Shqipëri për zbatimin e kurrikulës ndërkombëtare të trupave zgjedhore BRIDGE. Drejtueset e Administratës së KQZ-së, zj. Madalena Koja, Drejtore e Drejtorisë së Ligjshmërisë dhe zj. Valbona Ballgjini Drejtore e Drejtorisë së Subjekteve Zgjedhore, Mbikëqyrjes, Financimit dhe Monitorimit u certifikuan si trajnere të modulit BRIDGE.
Me mbështetjen e Institutit Ndërkombëtar për Demokraci dhe Asistencë Zgjedhore (International IDEA) dhe Këshillit të Evropës, KQZ bashkohet me mbi 40 vende të ndryshme të globit, të cilët përdorin kurrikulën ndërkombëtare BRIDGE.
