Komisioni Qendror i Zgjedhjeve (KQZ) dënon me forcë dhe e konsideron të papranueshme përhapjen e spekulimeve dhe dezinformatave mbi tenderin për Platformën e regjistrimit të votuesve të diasporës. Këto akuza janë të pabazuara dhe kanë si qëllim të minojnë besimin e qytetarëve në institucionet publike, duke krijuar një klimë mosbesimi dhe tensioni të panevojshëm.
Pretendimet që aplikacioni është një “farsë” ose “ka abuzim të fondeve publike” janë spekulime të rënda dhe të pavërteta. Praktika të tilla të deklarimeve publike, të cilat (me qëllim ose jo) qartazi dëmtojnë interesa madhore publike, duhet të marrin përgjigjen e merituar edhe ligjore.
Kjo Platformë është zhvilluar në përputhje me standardet më të larta të teknologjisë dhe sigurisë, duke përfshirë mekanizma autentifikimi të avancuar, si integrimi i një portofoli elektronik për verifikimin e sigurt të të dhënave. Çdo pretendim, që hedh poshtë këtë punë të bërë me profesionalizëm, është një sulm jo vetëm ndaj përpjekjeve të KQZ-së, por edhe të aktorëve të tjerë për të garantuar të drejtën e votës për diasporën.
Tenderi për realizimin e kësaj platforme është zhvilluar në përputhje me të gjitha parashikimet ligjore përkatëse. Për testimin e tregut janë ftuar 11 kompani, nga të cilat u përgjigjën 7. Në paraqitjen e ofertave u ftuan të gjitha kompanitë dhe ftesës ju përgjigjën vetëm 4 prej tyre. Fondi limit i parashikuar për këtë procedurë prokurimi ishte: 208,333,333 lekë pa tvsh, rreth 2.1 milion Euro. Vlera e kontratës së lidhur është 185,617,000 lekë pa tvsh, pra rreth 1.8 milion Euro (3 milion Euro thonë spekulantët!!!).
Është kompromentim i rëndë i ndershmërisë dhe shenjtërisë morale dhe profesionale dhe i personifikimit të mbrojtësit të interesit publik, kur jep gjykime dhe vlerësime, për procese, apo produkte, minimalisht pa kërkuar paraprakisht të dhëna, informacione, apo dokumentacione që lidhen me këto procese, apo produkte!!!
Aplikimi i gati 10 mijë votuesve nga jashtë në platformë, në vetëm dy ditë, është tregues i qartë i funksionalitetit, soliditetit dhe integritetit të PER. E duke qënë se për këtë, këta spekulantë nuk patën se cfarë të thonë, gjetën të tërheqin vëmendjen publike me atë atë që realisht shumë lehtë e përfshin publikun në komente, korrupsioni, tenderi, etj si këto.
Akuzat publike pa asnjë provë përbëjnë një sulm të pajustifikuar ndaj një procesi të ndershëm dhe profesional, që synon të garantojë të drejtën e votës për qytetarët shqiptarë jashtë vendit.
Përpjekjet për të politizuar këtë iniciativë të rëndësishme nuk do të dekurajojnë KQZ-në nga misioni i saj për të mbështetur të drejtën e votës për çdo qytetar shqiptar. Diaspora meriton respekt dhe mbështetje, jo shfrytëzim të shqetësimeve të saj për qëllime personale të papërshtatshme.
