Në bashkëpunim me Koalicionin për Reforma, Integrim dhe Institucione të Konsoliduara (KRIIK) trajnuam përfaqësues të institucioneve publike në 3 qarqe të vendit: Durrës, Gjirokastër, Korçë.
Trajnimi tre ditor kishte si synim njohjen e dispozitave e Kodit Zgjedhor dhe të akteve të KQZ-së, si dhe detyrimet që lindin prej tyre, lidhur me raportimin e veprimtarive publike në Ndërfaqen e Raportimit të Institucioneve (NRI) në KQZ.
Në trajnim morën pjesë aktorët kryesorë lokalë institucionalë, politikë, të shoqërisë civile e medias, për t’u informuar më në thellësi e për të diskutuar mbi nevojën e sigurimit të integritetit të zgjedhjeve, duke mos shpërdoruar burimet shtetërore.
Trajnimi përfshiu sesione teorike dhe praktike, duke përzier shembuj konkretë dhe seanca praktike për të konsoliduar njohuritë e të pranishmëve në lidhje me detyrimet e institucioneve publike për raportimin e veprimtarive publike gjatë periudhës 4 muaj para datës së zgjedhjeve.
Komisioni Qendror i Zgjedhjeve prezantoi hapat që duhet të ndjekin institucionet publike për tu regjistruar në ndërfaqen e raportimeve (NRI), aksesimi në ndërfaqe, afatet kohore që duhet të respektojnë për raportimin e një veprimtarie publike, llojet e veprimtarive publike që duhet të raportohen në NRI, dhe si bëhet shqyrtimi administrative i veprimtarive publike që raportohen në ndërfaqe. Roli i strukturës së KQZ-së për shqyrtimin e veprimtarive të raportuara.
Gjithashtu në këtë trajnim u shpjeguan në mënyrë të detajuar kategoritë e veprimtarive publike të ndaluara, veprimtaritë të cilat ndalohen të kryen nga titullarët e institucioneve apo nëpunësit e tjerë të institucioneve gjatë periudhës 4 muaj përpara datës së zgjedhjeve si dhe gjatë fushatës zgjedhore.
Trajnimi u realizua në kuadër të projektit “Programit të Granteve të Vogla të Komisionit për Demokraci” të Ambasadës së Shteteve të Bashkuara në Tiranë. Ndërfaqja Elektronike e Raportimit të Institucioneve (NRI) është mundësuar nga Projekti i Këshillit të Evropës ‘Fuqizimi i Integritetit të Zgjedhjeve në Shqipëri’ me mbështetjen financiare të Republikës Federale Gjermane.
