Sot Komisioneri Shtetëror i Zgjedhjeve, Ilirjan Celibashi mori pjesë në një tryezë të rëndësishme diskutimi mbi transparencën financiare të partive politike, integritetin zgjedhor dhe sfidat që lidhen me përdorimin e burimeve shtetërore. Zgjedhjet e 2025-ës përbëjnë një test kyç për demokracinë dhe standardet zgjedhore të Shqipërisë në kuadër të negociatave me BE-në.

Në këtë tryezë, të organizuar nga Instituti i Studimeve Politike (ISP), Fondacioni Westminster për Demokraci (WFD), Qëndresa Qytetare (QQ) dhe Komiteti Shqiptar i Helsinkit (KShH), u diskutua mbi sfidat aktuale që lidhen me financimin elektoral, krimet zgjedhore dhe integritetin e procesit zgjedhor. Vetëm përmes angazhimit të përbashkët dhe mekanizmave të fortë monitorimi mund të sigurojmë zgjedhje transparente dhe të ndershme.

Komisioneri Celibashi vlerësooi nismën e ndërmarrë nga KQZ, Prokuroria e Përgjithshme, SPAK dhe Policia e Shtetit për bashkërendimin e aktiviteteve para zgjedhjeve të 11 majit, me qëllim trajtimin e krimeve zgjedhore dhe garantimin e besimit në procesin zgjedhor. “Kjo iniciativë buron nga sjellja e përgjegjshme dhe pjekuria e këtyre institucioneve”, theksoi ai.

“Raportet e ODIHR/OSBE-së, analizat e shoqërisë civile dhe dokumentet strategjike, si Udhërrëfyesi për Funksionimin e Institucioneve Demokratike, kanë identifikuar sfida dhe kanë propozuar masa për përmirësimin e procesit zgjedhor. Megjithatë, pritshmëritë për një trajtim më të thelluar të këtyre problematikave në reformën zgjedhore janë përmbushur vetëm pjesërisht. Në këtë drejtim, nisma të mbështetura nga Ambasada e Mbretërisë së Vendeve të Ulëta dhe Ambasada Britanike kanë ndihmuar analizimin e këtyre sfidave përmes projekteve të shoqërisë civile”.