Promovimi i pjesëmarrjes së grave në zgjedhjet ishte tematika që u diskutua në tryezën e rrumbullakët të organizuar nga KQZ dhe UN Albania.

Angazhimi i grave në politikë, barazia gjinore në listat e kandidatëve për deputet dhe kandidatëve për këshillat bashkiak, gjuha e përdorur në fushatat zgjedhore ishin pikat kyçe të për të cilat u diskutua.

Tryeza bëri së bashku përfaqësues të partive politike, shoqërisë civile, organizatave ndërkombëtare që operojnë në fushën e zgjedhjeve dhe ekspertëve të çështjeve zgjedhore.

Duke marrë në konsideratë që jemi në prag të zgjdhjeve për Kuvend, Komisioneri Shtetëror i Zgjedhjeve, z. Ilirjan Celibashi solli në vëmëndje se për pak ditë përfundon afati i partive politike dhe koalicioneve zgjedhore për depozitimin e listave shumemërore dhe aty do të shikohet qasja e partive politike në raport me përfaqësimin gjinor, do t’i qëndrojnë kuotave të Kodit Zgjedhor apo do ta tejkalojnë dhe do të përmirësojnë atë.

Nënvizoi faktin që nuk jemi aty ku duhet të jemi, ndaj i bëri apel partive politike që për zgjedhjet për Kuvend, të datës 11 maj 2025, të ndërmarrin disa hapa që përmirësojnë kushtet e marrjes pjesë të grave në fushatë, duke rritur mbështetjen financiare të tyre, duke ju dhënë akses në financat e partive për fushatën zgjedhore, kohë televizive e të tjerë.

Celibashi theksoi se pavarësisht përmirësimeve ligjore që janë bërë në raport me rritjen e pjesëmarrjes së grave në zgjedhjet, kjo nuk ka garantuar barazinë e përfaqësimit në politike. “Problematika më e theksuar vihet re pas zgjedhjeve për organet e qeverisjes vendore, ku gratë janë ato që japin dorëheqjen njëra pas tjetrës duke u zëvëndësuar me burrat në listë dhe kjo vërtetohet edhe nga statistikat (85 gra të dorëhequra nga këshillat bashkiak/ për 11 parti politike janë tërhequr të gjitha gratë e listës shumemërore)”.

Znj. Fiona McCluney, Koordinatore e Përhershme e OKB-së në Shqipëri tha se “Për të arritur plotësisht Objektivin e Zhvillimit të Qëndrueshëm 5, nuk mjafton vetëm rritja e përfaqësimit të grave, por duhet të sigurohet edhe pjesëmarrja e tyre kuptimplotë në proceset politike. Kjo kërkon eliminimin e barrierave strukturore, sigurimin e aksesit të barabartë në rolet drejtuese dhe krijimin e një mjedisi mundësues për fuqizimin politik të grave.

Gjatë viteve, Shqipëria ka bërë përparime të jashtëzakonshme në promovimin e pjesëmarrjes politike të grave, si në nivel qendror ashtu edhe në atë vendor. Megjithatë, arritjet e së kaluarës nuk janë një garanci për progres të vazhdueshëm. Ende ekzistojnë sfida për të siguruar pjesëmarrje të mirëfilltë politike për gratë në Shqipëri, ndaj duhet të ruajmë progresin e bërë, të parandalojmë regresin dhe të avancojmë më tej barazinë gjinore. Roli i partive politike në nxitjen e barazisë gjinore është kyç, veçanërisht teksa po i afrohemi zgjedhjeve të përgjithshme”.

Përfaqësuesit e partive politike trajtuan strategjitë e partive për përfshirjen e grave në politike dhe në vendimmarrje dhe sfidat në aksesimin e medias dhe financave gjatë fushatës zgjedhore.

Gjithashtu, pjesëmarrësit u sollën në vëmendje gjuhën e urrejtjes dhe denigrimi që u bëhet grave në median sociale.