Në përfundim të analizës së zgjedhjeve parlamentare dhe verifikimit paszgjedhor, Komisioneri Shtetëror i Zgjedhjeve, z. Ilirjan Celibashi mori pjesë në takimin e International Election Working Group (IEWG), grupimit të ambasadorëve të vendeve anëtare të OSBE në Tiranë, për t’i njohur me aktivitetin dhe nevojat e KQZ për përmirësimin e mëtejshëm të administrimit të zgjedhjeve.
KQZ njeh dhe vlerëson mbështetjen që i është dhënë nga shumë organizata dhe institucione të tjera ndërkombëtare të përfaqësuara zyrtarisht në Tiranë, ndaj tha Celibashi “I shpreh grupimit të 30 ambasadorëve mirënjohjen dhe falënderimet e sinqerta për mbështetjen dhe ndihmën ndaj KQZ në përmbushjen e përgjegjësive të saj”.
“Me shumë dashamirësi konstatova faktin që IEWG vazhdon të tregojë vullnet, dëshirë dhe interes për të mbështetur KQZ-në në sfidat e saj për të ardhmen dhe i sigurova se në Shqipëri ky do të jetë investimi i tyre më fitimprurës dhe më i prekshëm”.
Komisioneri theksoi se KQZ-ja është plotësisht e përkushtuar dhe e interesuar për të bashkëpunuar me të gjithë komunitetin ndërkombëtar. Institucioni ka një potencial të madh dhe është jashtëzakonisht i prirur të punojë së bashku me partnerët në projekte sfiduese për të ardhmen.
Celibashi vlerësoi se tani është koha për të përgatitur dhe zhvilluar projekte të ndryshme, në mënyrën më të mirë të mundshme dhe falenderoi në mënyrë të veçantë OSBE dhe Del Monaco, zonjën Yuri Kim, zotin Luigi Soreca, zotin Alastair King-Smith, zotin Peter Zingraf dhe të gjithë të tjerët për bashkëpunimet e ardhshme me KQZ. Ai tha se KQZ do të vijojë punën për të përmbushur rekomandimet e OSBE/ODIHR për KQZ dhe për administrimin cilësor të proceseve të ardhshme zgjedhore.
