Sot, Komisioneri Shtetëror i Zgjedhjeve miratoi formatin dhe specifikimeve të vulës së Komisionit të Zonës së Administrimit Zgjedhor (KZAZ), Komisionit të Qendrës së Votimit (KQV), vulës së kryetarit të Komisionit të Qendrës së Votimit dhe vulës rezervë të Komisionit të Qendrës së Votimit, të KZAZ-së nr. 88, për zgjedhjet për kryetar të bashkisë Himarë, Qarku Vlorë, të datës 4 gusht 2024”.
U caktuan partitë politike që do të propozojnë anëtarët dhe sekretarin e Komisionit të Zonës së Administrimit Zgjedhor nr. 88. Në zbatim të vendimit nr. 35, datë 15.9.2023 të Kolegjit Zgjedhor partitë politike që do të propozojnë anëtarët e KZAZ nr. 88, që do të ngrihet dhe funksionojë për zgjedhjet e pjesshme për Kryetarin e Bashkisë Himarë, janë si më poshtë:
- Tre anëtarë propozohen nga “Partia Socialiste e Shqipërisë” (PSSH);
- Dy anëtarë propozohen nga “Partia Demokratike” (PDSH);
- Një anëtar propozohet nga “Partia e Lirise” (PL).
Pas cakimit të partive politike që kanë të drejtën për të propozuar anëtarë të KZAZ-së, u hodh shorti për caktimin e anëtarit të shtatë të KZAZ-së mes PS dhe PD. Rezultatet e shortit përcaktuan se anëtari i shtatë i KZAZ-së nr. 88 do të propozohet nga “Partia Demokratike”.
Sekretari i KZAZ-së do të propozohet nga “Partia Socialiste”.
Gjithashtu, KSHZ vendosi dërgimin për verifikim të thelluar të subjektit vetëdeklarues z. Tonin Zef Marinaj, Kryetar në Bashkinë Malësi e Madhe, i propozuar nga subjekti zgjedhor “Partia Socialiste e Shqipërisë”, dhe dërgimin e të dhënave përkatëse Prokurorisë së Përgjithshme për vlerësim të mëtejshëm.
Në seancën e sotme u plotësuan vakancat e krijuara në këshillat bashkiak:
- Këshilli i Bashkisë Pogradec, me kandidatin nga lista shumemërore e subjektit zgjedhor Partia Socialiste e Shqipërisë, zj. Sara Olldashi;
- Këshilli i Bashkisë Roskovec, me kandidatin nga lista shumemërore e subjektit zgjedhor Partia Socialiste e Shqipërisë, zj. Aleksandra Lamaj;
- Këshilli i Bashkisë Devoll, me kandidatin nga lista shumemërore e subjektit zgjedhor Partia Socialiste e Shqipërisë, z. Alfredi Gjata;
- Këshilli i Bashkisë Lezhë, me kandidatin nga lista shumemërore e subjektit zgjedhor Partia Socialdemokrate, z. Ervin Coli.
