Me kërkesë të Kolegjit Zgjedhor, KQZ depozitoi projektvendimin “Për miratimin e disa karakteristikave teknike të fletës së votimit për zgjedhjet e pjesshme për Kryetar të Bashkisë Himarë, të datës 4 Gusht 2024”. 

Kolegji Zgjedhor vendosi miratimin e karakteristikave teknike të fletës së votimit, pasi i vlerësoi si të bazuara në Kodin Zgjedhor. Fleta e votimit do të ketë ngjyrë të njëjtë si fleta e votimit në zgjedhjet e kaluara për organet e qeverisjes vendore të zhvilluara në datën 14 maj 2023.

Gjithashtu, përveç elementeve të sigurisë dhe elementëve teknikë në formën e kodeve që identifikojnë zonën zgjedhore, qendrën e votimit, do të ketë edhe elementë të tjerë identifikues që nuk lexohen me sy të lirë.